Лукашэнка прапануе Мазамбіку “досвед у механізацыі сельскай гаспадаркі”

25 чэрвеня, Позірк. Беларусь разглядае Мазамбік як “стратэгічны пункт апоры на паўднёва-ўсходнім узбярэжжы Афрыкі” і гатова да далейшага паглыблення двухбаковага супрацоўніцтва, “у тым ліку з удзелам суседніх дзяржаў рэгіёну”, заявіў Аляксандр Лукашэнка ў віншаванні прэзідэнту краіны Даніэлу Франсішку Шапу з Днём Незалежнасці.

“Дружалюбныя адносіны паміж нашымі краінамі вытрымалі выпрабаванне часам. Яшчэ паўстагоддзя таму Беларусь унесла свой уклад у барацьбу мазамбікскага народа за нацыянальнае вызваленне ад каланіяльнага панавання”, — цытуе Лукашэнку яго прэс-служба.

Віншавальнік выказаў перакананне, што “досвед беларускага боку ў механізацыі сельскай гаспадаркі, забеспячэнні харчовай бяспекі, мадэрнізацыі горназдабыўной прамысловасці будзе садзейнічаць эканамічнаму развіццю Мазамбіка і павышэнню дабрабыту яго грамадзян”.

30 красавіка паведамлялася, што ўпершыню ў гісторыі адносін з Мазамбікам у Беларусі акрэдытаваны ваенны дыпламат з гэтай афрыканскай краіны — акрэдытаваны аташэ па пытаннях абароны пры пасольстве Мазамбіка ў Расіі і Беларусі (па сумяшчальніцтве) палкоўнік Педру Ціагу Каува.

Сумесна займацца будаўніцтвам порта ў афрыканскай краіне прапанаваў Лукашэнку 19 лютага ў Мінску прадстаўніку яе заходняга суседа — старшыні Сената Зімбабвэ Мейбл Мемары Чынамонэ.

Інтарэсы Мінска ў Мазамбіку прадстаўляе амбасадар у Паўднёва-Афрыканскай Рэспубліцы (цяпер пасаду займае Ігар Белы). Паводле даных амбасады ў ПАР, у 2021 годзе тавараабарот Беларусі і Мазамбіка склаў 957,9 тыс. долараў (беларускі экспарт — 742,1 тыс.).

У чэрвені 2025 года Беларусь наведваў міністр сельскай гаспадаркі, навакольнага асяроддзя і рыбалоўства Мазамбіка Роберту Міту Альбіну.

Лукашэнка неаднаразова пацвярджаў гатоўнасць прыняць прэзідэнта Мазамбіка ў Мінску або наведаць сталіцу Мапуту з афіцыйным візітам для “прадметных перамоваў па ўсім комплексе пытанняў двухбаковага і міжнароднага парадку дня”.

Дыпламатычныя адносіны паміж дзяржавамі ўстаноўлены 29 лютага 2000 года.