Два чалавекі загінула ў аўтамабільнай аварыі ў Буда-Кашалёўскім раёне

6 чэрвеня, Позірк. Два чалавекі загінула ўвечары 5 чэрвеня ў дарожна-транспартным здарэнні ў Буда-Кашалёўскім раёне, паведамляе Дзяржаўтаінспекцыя Гомельскай вобласці.

Аварыя здарылася каля 18:20 на дарозе Н-4631 (Буда-Кашалёва — Пыцькоўка). Паводле папярэдняй інфармацыі, 27-гадовы кіроўца JAC “адцягнуў увагу ад кіравання і выехаў на паласу сустрэчнага руху”, дзе сутыкнуўся з аўтамабілем “Жыгулі”. 55-гадовы кіроўца і 53-гадовая пасажырка апошняга сутыкненне не перажылі.

На гэтым фоне МУС нагадала, што кіроўца “абавязаны сачыць за дарожным становішчам, быць вельмі пільным і не рабіць неабдуманых манеўраў”.