У Чавусах пара сужэнцаў загінула пад коламі аўтобуса без кіроўцы

16 траўня, Позірк. Два чалавекі загінула пад коламі аўтобуса ў Чавусах (Магілёўская вобласць) ранкам 16 траўня, паведамляе прэс-служба Следчага камітэта.

Згодна з інфармацыяй ведамства, гэта адбылося з прычыны “самаадвольнага руху аўтобуса” на гарадской аўтастанцыі.

“Паводле папярэдніх звестак следства, 41-гадовы кіроўца, прыбыўшы на аўтастанцыю, зачыніў дзверы і пакінуў салон, — гаворыцца ў паведамленні. — У нейкі момант аўтобус пачаў рух у бок гандлёвых павільёнаў, у кірунку якіх ішлі муж і жонка (70 і 66 гадоў). Транспартны сродак здзейсніў наезд на пешаходаў, пасля чаго сутыкнуўся з легкавым аўтамабілем, які стаяў на шляху”.

Кіроўца патлумачыў, што “не заглушыў рухавік і накіраваўся ў будынак аўтастанцыі, каб адзначыць пуцявы ліст”.

Чавускі раённы аддзел СК распачаў крымінальную справу паводле ч. 3 арт. 317 КК (парушэнне правілаў дарожнага руху або эксплуатацыі транспартных сродкаў асобай, якая кіруе транспартным сродкам, што пацягнула з неасцярожнасці смерць дзвюх асоб).