Літоўскія памежнікі затрымалі суайчынніка, які атрымаў беларускія цыгарэты праз плот на мяжы

23 красавіка, Позірк. Аб затрыманні каля мяжы з Беларуссю жыхара Ладзіяйскага раёна з кантрабанднымі беларускімі цыгарэтамі паведаміла Служба аховы дзяржаўнай мяжы (САДМ) пры МУС Літвы.

Адзначаецца, што ўвечары 22 красавіка аператар сістэмы відэаназірання памежнай заставы Кабеляй Варэнскага памежнага атрада “зафіксаваў, як у раёне вёскі Пясчай (Варэнскі раён) з боку Беларусі праз ахоўны плот пералятаюць звязкі”.

“Месца парушэння, куды тэрмінова выехалі дзве змены памежных нарадаў, было блакаванае, пачаліся пошукі. Неўзабаве быў заўважаны мужчына, нагружаны скруткамі, які перасякаў лясную дарогу; убачыўшы супрацоўнікаў САДМ, ён кінуў груз і пусціўся бегчы“, — гаворыцца ў паведамленні.

“Адна група памежнікаў выявіла кінутыя дзевяць прастакутных скруткаў, абматаных чорнай поліэтыленавай плёнкай. Тым часам іншыя супрацоўнікі САДМ усяго ў некалькіх сотнях метраў ад іх, у ваколіцах вёскі Шклярай, затрымалі насільшчыка. Высветлілася, што гэта 29-гадовы жыхар Лаздзіяйскага раёна, які ўжо не раз меў праблемы на мяжы. Праўда, у гэтых месцах ён не з’яўляўся блізу двух гадоў“, — адзначыла служба.

Таксама было “ўстаноўлена, што мужчына знаходзіўся ў памежнай зоне, не будучы ўключаным у склад САДМ спіс асоб, якія маюць права там знаходзіцца“.

Адзначаецца, што затрыманы і груз былі дастаўленыя на памежную заставу Кабеляй. Разрэзаўшы ўпакоўку, памежнікі налічылі 1.240 пачкаў цыгарэт “NZ Gold” з беларускімі акцызнымі маркамі. Кошт такой колькасці нелегальных тытунёвых вырабаў з улікам усіх абавязковых да выплаты ў Літве падаткаў складае 6.671 еўра.

За незаконную перавозку падакцызных тавараў паўторна ў дачыненні да мужчыны распачатая адміністрацыйная вытворчасць. Па дадзеных СОГГ, яму пагражае штраф ад 5.760 да 6.000 еўра, а за паўторнае парушэнне прававога рэжыму памежнай зоны — яшчэ ад 90 да 170 еўра, ён адпушчаны з позвай з’явіцца на заставу для разгляду адміністрацыйнай справы.