У Мінску сямігадовы хлопчык загінуў, выпаўшы з акна шостага паверха

11 лістапада, Позірк. У Мінску сямігадовы хлопчык загінуў, выпаўшы з акна шостага паверха, паведамляе Следчы камітэт.

Паводле папярэдняй інфармацыі, дзіця, якое знаходзілася дома з айчымам і чатырохгадовай сястрой, выпала з акна, абапёршыся на маскітную сетку. Мужчына ў гэты час знаходзіўся на кухні.

Відавочца выклікаў хуткую дапамогу і паведаміў пра здарэнне ў міліцыю. Дзіця даставілі ў бальніцу, аднак выратаваць яго не ўдалося.

СК заклікае бацькоў рэгулярна нагадваць дзецям аб правілах бяспечных паводзін, не пакідаць малалетніх без нагляду нават на непрацяглы час.

Рэкамендуецца абсталяваць усе вокны ў кватэры адмысловымі замыкалымі прыладамі і выкарыстоўваць іх па прызначэнні, не ставіць мэблю каля вокнаў, тлумачыць дзецям жыццёва важныя правілы бяспекі.