Пяцёра беларусаў і шасцёра расіян пацярпела ў выніку ДТЗ з аўтобусам у Тайландзе

8 лістапада, Позірк. Пяцёра беларусаў і шасцёра расіян пацярпела ў дарожна-транспартным здарэнні з аўтобусам на тэрыторыі гатэля ў раёне нацыянальнага парка Сай Ёк у Тайландзе, паведаміла 8 лістапада агенцтва ТАСС са спасылкай на загадчыка консульскага аддзела амбасады РФ Іллю Ільіна.

Да ўдакладнення гэтае расійскае медыя, спасылаючыся на турыстычную паліцыю Тайланда, заяўляла, што ў выніку аварыі ў тайскай правінцыі Канчанабуры пацярпела 11 грамадзян Расіі. Было заяўлена, што пацярпелыя дастаўленыя ў мясцовую бальніцу, “некаторым з іх спатрэбілася шпіталізацыя ў сувязі з атрыманнем цяжкіх траўмаў”.

Амбасада Беларусі ў В’етнаме, якая адказвае за прадстаўленне інтарэсаў Мінска ў Тайландзе, а таксама прэс-служба Міністэрства замежных спраў сітуацыю пакуль не каментавалі.