Еўрасаюз вітаў вызваленне супрацоўніка свайго мінскага прадстаўніцтва Мікалая Хіло і іншых палітвязняў

12 верасня, Позірк. Еўрасаюз вітаў вызваленне супрацоўніка свайго мінскага прадстаўніцтва Мікалая Хіло і іншых палітвязняў па выніках візіту амерыканскай дэлегацыі ў Мінск.

“Вызваленне палітвязняў у Беларусі — добрая навіна. Я рада, што наш калега Мікалай Хіло апынуўся сярод вызваленых. Мікалай шчасліва прыбыў у наша прадстаўніцтва ў Вільнюсе“, — напісала ў “Х” прэзідэнт Еўрапейскай камісіі Урсула фон дэр Ляен.

Яна падзякавала за падтрымку прэзідэнту ЗША Дональду Трампу. “Наша праца па вызваленні ўсіх палітвязняў працягваецца”, — падкрэсліла кіраўнік Еўракамісіі.

“Вялікай палёгкай” назвала вызваленне Хіло вярхоўны прадстаўнік ЕС па замежных справах і палітыцы бяспекі, віцэ-прэзідэнт Еўракамісіі Кая Калас. “Я падзяляю радасць яго сям’і і сяброў. Хачу падзякаваць нашым амерыканскім партнёрам за іх намаганні і ўдзел у садзейнічанні яго вызваленню“, — заявіла Калас.

Мікалаю Хіло 41 год. Скончыў Мінскі дзяржаўны лінгвістычны ўніверсітэт (са жніўня 2025 года Беларускі дзяржаўны ўніверсітэт замежных моў). Да прадстаўніцтва ЕС працаваў у недзяржаўнай інфармацыйнай кампаніі БелаПАН. Быў прапаведнікам царквы евангельскіх хрысціян-баптыстаў “Дабравесце”.

Хіло быў затрыманы 24 красавіка 2024 года каля прадстаўніцтва ЕС у цэнтры Мінска. 30 снежня 2024 года прыгавораны да 4 гадоў пазбаўлення волі па арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) і 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) Крымінальнага кодэкса.