Трохгадовае дзіця выпала з акна і загінула ў Хоцімску

30 жніўня, Позірк. Пра гібель пятага паверха шматпавярховага дома дзіцяці, якое выпала з акна, у Хоцімску (Магілёўская вобласць) паведаміў Следчы камітэт.

“Па папярэдніх дадзеных, ноччу 30 жніўня бацькі трохгадовага хлопчыка адлучыліся з дому, пакуль дзіця спала. Усе вокны ў кватэры былі зачыненыя”, — гаворыцца ў рэлізе.

Праз паўгадзіны яны вярнуліся, аднак сына не было ў пакоі. “Пошукі прывялі да прыадчыненага акна ў дзіцячай. Бацька хлопчыка ўбачыў маскітную сетку ўнізе. Выбегшы на вуліцу, ён знайшоў сына без прытомнасці. Бацькі неадкладна адвезлі яго ў бальніцу, але выратаваць дзіця не ўдалося”, — паведамляе СК.

На месцы здарэння працавала следча-аператыўная група. Раённы аддзел СК праводзіць праверку.

Аб падзенні дзевяцігадовага хлопчыка з акна трэцяга паверха ў Гомелі паведамляў СК 22 жніўня. Дзіця знаходзіцца ў рэанімацыі. Развіццё сітуацыі невядома.

Раней ведамства распаўсюдзіла інфармацыю аб гібелі 9 жніўня ў Мінску малалетняга дзіцяці, якое выпала з акна шматпавярховага дома.

28 ліпеня паведамлялася аб падзенні з акна ў Баранавічах (Брэсцкая вобласць) шасцігадовага дзіцяці. “Маляня выжыла, але атрымала цяжкія траўмы”, — адзначаў Следчы камітэт.

16 ліпеня СК паведаміў аб трэцім выпадку падзення дзяцей з вокнаў за шэсць дзён. Інцыдэнты адбыліся ў Мінску, Магілёве і Магілёўскай вобласці, дзеці атрымалі розныя траўмы.

Паводле даных Генеральнай пракуратуры на 9 ліпеня, з пачатку 2025 года пры падзенні з вокнаў загінула шэсць дзяцей, тады як за аналагічны перыяд 2024-га — адно дзіця.