МАРГ паскардзіўся сілавікам на “Вайлдберыз” за продаж налепак з надпісам “Жыве Беларусь”

15 ліпеня, Позірк. “Прапанова да рэалізацыі розных тавараў (абкладак на пашпарты і налепак), што змяшчаюць інфармацыю, якая мае прыкметы “экстрэмісцкай сімволікі і атрыбутыкі”, выяўлена на інтэрнэт-пляцоўцы “Вайлдберыз”, паведамляе прэс-служба Міністэрства антыманапольнага рэгулявання і гандлю.

Паводле апісання тавару на скрыншоце, выкарыстаным у рэлізе, на налепцы, прызначанай для размяшчэння на лабавое шкло аўтамабіля, змешчаны надпіс “Жыве Беларусь”. Фота самой налепкі і абкладак на пашпарт былі размытыя.

Выяўленая інфармацыя “для прыняцця мер рэагавання перададзена ў праваахоўныя органы”, адрапартаваў МАРГ.

У лютым МАРГ накіраваў “Вайлдберыз” патрабаванне спыніць продаж забароненых тавараў (парфумерыя, касметыка і інш.), “вырабленых у краінах, што ўвялі санкцыі і вядуць недружалюбную палітыку ў дачыненні да Беларусі”.

МАРГ выдавала прадаўцу 10 прадпісанняў у 2024 годзе, у 2023-м — чатыры (плюс адно патрабаванне пра забарону продажу забароненых тавараў), сем — у 2022 годзе.

1 кастрычніка 2024 года Генпракуратура прадпісала “Вайлдберыз” зняць з продажу беспілотнікі.

Прадстаўнікі “Вайлдберыз” удзельнічалі 17 лютага ў сустрэчы Аляксандра Лукашэнкі з прадстаўнікамі прадпрымальніцкай сферы.

Паводле слоў Лукашэнкі, яму паступіў ліст з урада, датычны развіцця дзейнасці гэтага маркетплэйса ў Беларусі.

“Яны гатовыя пашырацца тут і прадаваць. Пытанне: што прадаваць? “Мы імкнёмся да імпартазамяшчэння. Наш рынак невялікі, але мы хацелі б заняць гэты рынак сваёй прадукцыяй”. І гэтак далей і да таго падобнае. Калі так — ласка запрашаем”, — цытуе Лукашэнку яго прэс-служба.

(Wildberries) — найбуйнейшы расійскі маркетплэйс. Працуе ў Расіі, Беларусі, Казахстане, Кыргызстане, Арменіі, Узбекістане і Кітаі.