У Оршы загінула 8-гадовае дзіця, якое выпала з акна сёмага паверха

1 ліпеня, Позірк. Пра гібель у Оршы (Віцебская вобласць) 8-гадовага дзіцяці, паведамляе Следчы камітэт.

Адзначаецца, што 1 ліпеня дзіця “выпала з акна, размешчанага на балконе сёмага паверха”.

“Паводле папярэдніх звестак, бабуля прыглядала за трыма непаўналетнімі дзецьмі. Трагедыя адбылася, калі жанчына на некалькі хвілін выйшла ў суседні пакой, пакінуўшы дзіця аднаго”, — гаворыцца ў паведамленні.

“Убачыўшы адкрытае акно і ўнука, які ляжаў на зямлі, пенсіянерка выбегла на вуліцу і выклікала хуткую дапамогу. Выратаваць дзіця не ўдалося — ад атрыманых траўмаў яно памерла ў бальніцы”, — паведамілі ў СК.

На месцы здарэння працуе следча-аператыўная група, высвятляюцца падрабязнасці трагедыі.

30 чэрвеня паведамлялася пра гібель у Астраўцы (Гродзенская вобласць) 5-гадовага хлопчыка. Паводле даных СК, увечары 28 чэрвеня ён патануў у калодзежы ачышчальных ліўневых збудаванняў.

У першым квартале 2025 года ад знешніх прычын у Беларусі загінула 32 непаўналетніх, паведаміла 7 траўня аб’яднанне BelPol са спасылкай на атрыманы службовы ліст намесніка генеральнага пракурора Аляксея Стука ў Міністэрства адукацыі, Міністэрства працы і сацыяльнай абароны і мясцовыя органы ўлады.

Адзначалася, што смяротнасць вырасла на 52,4% — з 21 выпадку (з якім перыядам праведзена параўнанне, у лісце не пазначана).

У 2024 годзе ў Беларусі ад знешніх прычын загінула 126 дзяцей — на 34% больш, чым у 2023-м (94), паведаміў на прэс-канферэнцыі 24 сакавіка ў Мінску намеснік начальніка галоўнага ўпраўлення — начальнік упраўлення па наглядзе ў сацыяльнай сферы Генеральнай пракуратуры Павел Зайцаў.

Паводле яго слоў, асноўнымі прычынамі гібелі былі суіцыды, дарожна-транспартныя здарэнні, утапленні і пажары (лічбы па кожнай катэгорыі спікер не прывёў).