У Магілёве патануў 21-гадовы эфіопскі студэнт
25 траўня, Позірк. Пра смерць замежнага грамадзяніна 24 траўня ў Магілёве паведамляе прэс-служба Міністэрства па надзвычайных сітуацыях.
У 18:22, як адзначаецца, “ратавальнікам паступіла паведамленне аб тым, што ў рацэ Днепр па вуліцы Праванабярэжнай у Магілёве тоне чалавек”, да месца здарэння “неадкладна выехалі работнікі МНС і ТРВОД”.
“Як высветлілася, кампанія маладых людзей адпачывала на беразе ракі Днепр. Адзін з хлопцаў вырашыў выкупацца. Крыху праплыўшы, мужчына знік з паверхні вады. 21-гадовы патанулы малады чалавек з’яўляецца грамадзянінам Эфіопіі і студэнтам адной з ВНУ Магілёва”, — гаворыцца ў паведамленні.
Месца, дзе патануў іншаземец, не абсталяванае для купання, падкрэслілі ў МНС.
Праверку па факце ўтаплення праводзіць Магілёўскі міжраённы аддзел Следчага камітэта.
У Паставах жанчына патанула ў калодзежы
23 траўня, Позірк. Аб двух патанулых за мінулыя дзяжурныя суткі (з 6:00 22 траўня да 6:00 23 траўня) паведамляецца ў аператыўнай зводцы Міністэрства па надзвычайных сітуацыях. У Паставах (Віцебская вобласць) з пітнога калодзежа вынятая жанчына 1972 года нараджэння, адзначае ведамства. …
