BelPol перадаў у структуры ЕС інфармацыю пра асоб, якія “датычныя да фальсіфікацый т.н. выбараў 2025 года”

24 студзеня, Позірк. “Інфармацыю аб асобах, якія маюць дачыненне да фальсіфікацыі так званых выбараў 2025 года”, перадала для прадстаўнікоў Еўрапейскай службы знешніх дзеянняў і Еўрапейскай камісіі аб’яднанне былых супрацоўнікаў беларускіх сілавых структур BelPol на закрытым брыфінгу 22 студзеня ў Брусэлі, паведамляе арганізацыя.

Адзначаецца, што брыфінг быў прымеркаваны да публікацыі расследавання BelPol “Збройны барон. Частка другая“, і на ім “акрамя звестак, уключаных у апублікаванае расследаванне, была прадстаўленая інфармацыя закрытага характару“.

Паводле інфармацыі аб’яднання, на мерапрыемстве абмяркоўваліся “пытанні, звязаныя з уцягнутасцю рэжыму Лукашэнкі ў вайну супраць Украіны; працэсамі мілітарызацыі беларускай эканомікі; магчымымі спосабамі абыходу санкцыйных абмежаванняў; прапановамі па ўмацаванні і паляпшэнні санкцыйнага ціску“.

У BelPol адзначылі, што правядзенне такіх мерапрыемстваў мае ключавое значэнне для арганізацыі ў межах працы над новымі санкцыямі ЕС. “Дзякуючы гэтым намаганням мы імкнемся зрабіць унёсак у фармаванне больш жорсткай і эфектыўнай санкцыйнай палітыкі ў дачыненні да рэжыму Лукашэнкі“, — падкрэсліваецца ў рэлізе.

23 студзеня начальнік упраўлення Генеральнай пракуратуры Дзмітрый Брылёў паведаміў аб адкрыцці вытворчасці ў дачыненні да “ўдзельнікаў экстрэмісцкага фарміравання BelPol“ паводле ч. 1 арт. 203¹ Крымінальнага кодэкса (наўмысныя незаконныя збор, прадастаўленне інфармацыі пра асабістае жыццё і (ці) персанальных звестак іншай асобы без яе згоды, што прывяло да прычынення істотнага шкоды правам, свабодам і законным інтарэсам грамадзяніна).

Днём раней, 22 студзеня, ініцыятыва BelPol паведаміла аб атрыманні спісаў больш за 10 тыс. членаў выбарчых камісій і назіральнікаў.

Каментуючы “Позірку“ інфармацыю аб пачатку крымінальнай справы, у арганізацыі адзначылі: “Мы вельмі ўсцешаныя, што патрапілі ў цэль! Мы ведаем іх прозвішчы, і рана ці позна гэтыя людзі адкажуць па законе“.