Беларусь зацікаўленая ў пашырэнні сувязей з Бахрэйнам, заяўляе Лукашэнка

16 снежня, Позірк. Беларусь зацікаўленая ў пашырэнні сувязей з Бахрэйнам і “больш поўнай рэалізацыі ўсіх магчымасцей супрацы”, адзначыў Аляксандр Лукашэнка, віншуючы 16 снежня караля гэтай краіны шэйха Хамада бен Ісу аль-Халіфу, наследнага прынца Сальмана бен Хамада аль-Халіфу, а таксама народ з Нацыянальным днём.

Віншавальнік, мяркуючы з апублікаванага яго прэс-службай тэкста паслання, упэўнены, што “пашырэнне беларуска-бахрэйнскага палітычнага дыялогу, а таксама актывізацыя ўзаемавыгаднай супрацы па розных напрамках, у першую чаргу ў гандлёва-эканамічнай, інвестыцыйнай і гуманітарнай сферах, цалкам адпавядае інтарэсам абодвух народаў”.

Пад кіраваннем цяперашняга караля, які ўзышоў на трон у 1971 годзе, Бахрэйн працягвае паспяхова развівацца, адзначыў Лукашэнка. “Вашы эфектыўныя намаганні па ўмацаванні эканомікі, падтрымцы сацыяльнай стабільнасці і павелічэнню ролі краіны на міжнароднай арэне заслугоўваюць глыбокай павагі”, — звярнуўся ён да кіраўніка дзяржавы.

Дыпламатычныя стасункі паміж краінамі ўсталяваныя 1 ліпеня 1996 года. Інтарэсы Мінска ў Бахрэйне прадстаўляе беларускі амбасадар у Аб’яднаных Арабскіх Эміратах, інтарэсы Манамы ў Беларусі — бахрэйнскі амбасадар у Расіі.

Міністэрства замежных спраў Беларусі раней адзначала, што гандлёва-эканамічная супраца паміж Беларуссю і Бахрэйнам “не мае актыўнага характару”. Па выніках 2021 года беларускі экспарт тавараў склаў 300 тыс. долараў, пра бахрэйнскія пастаўкі не паведамлялася.