EPAM чакае падзення выручкі ў 2023 на фоне крызісу. Прыбытак расце
EPAM прагназуе падзенне выручкі ў 2023 годзе на 100-125 мільёнаў долараў праз зніжэнне кліенцкага попыту. Гэта вынікае з фінансавай справаздачнасці кампаніі за другі квартал.
Выручка
Па выніках першага квартала EPAM скарэктаваў свае прагнозы выручкі. Аднак выніковыя даходы выявіліся яшчэ ніжэйшымі.
За красавік–чэрвень EPAM атрымаў выручку ў памеры 1,17 мільярда долараў пры прагнозе 1,19-1,20 мільярда долараў. У параўнанні з аналагічным перыядам мінулага года выручка знізілася амаль на 25 мільёнаў долараў, або на 2,1%. Гэта адбылося ўпершыню за апошнія некалькі гадоў. Дагэтуль квартальная выручка заўсёды расла адносна мінулага года.
Максімальную за ўвесь час выручку кампанія атрымала ў чацвёртым квартале мінулага года — 1, 23 мільярда долараў. Але сёлета ўжо два кварталы запар выручка плаўна зніжаецца.
У выніку па першым паўгоддзі выручка EPAM вырасла ў параўнанні з такім жа перыядам мінулага года ўсяго на 14,6 мільёна долараў.
У трэцім квартале EPAM чакае далейшага падзення выручкі да 1,14-1,15 мільярда долараў. Таксама кампанія другі раз сёлета знізіла выніковы прагноз выручкі.
Хоць яшчэ ў лютым кампанія прагназавала рост выручкі ў 2023 годзе прыкладна на 9% да 5,25 мільярда долараў. Але пазней EPAM перагледзеў прагноз і знізіў чаканую выручку да 4,95-5 мільярдаў долараў. Што праўда, сітуацыя на рынку вымусіла кампанію яшчэ раз скарэктаваць лічбы. Цяпер кампанія чакае за год выручку ў межах 4,65-4,7 мільярда долараў. Гэта на 125 мільёнаў долараў менш, ніж у 2022 годзе (тады EPAM атрымаў 4,82 мільярда долараў).
Чысты прыбытак
У адрозненне ад выручкі чысты прыбытак кампаніі працягвае расці. За другі квартал ён перавысіў 120 мільёнаў долараў (рост у 6 разоў адносна другога квартала 2022 года). Па выніках шасці месяцаў чысты прыбытак EPAM склаў 222,3 мільёна долараў — у 2 разы большы ў параўнанні з першым паўгоддзем 2022.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.
У 2023 годзе мы хочам сабраць 1000 чытачоў-падпісчыкаў.
Дапамагчы нам можна праз Patreon.
І яшчэ крыптой, тут гаманцы.
Дзякуй, што прачыталі гэтае паведамленне.
Читать на dev.by