У Вярхоўнай Радзе заклікалі дэмакратычныя краіны разарваць дыпадносіны з Беларуссю

26 сакавіка, Позірк. Разарваць дыпламатычныя адносіны з Беларуссю заклікала дэмакратычныя дзяржавы міжфракцыйнае аб’яднанне (МФА) Вярхоўнай Рады Украіны “За дэмакратычную Беларусь”.

У дакуменце, які апублікаваў у сваім тэлеграм-канале яе кіраўнік Аляксей Ганчарэнка 25 сакавіка, сказана, што Дзень Волі ў Беларусі “забаронены дыктатарскім рэжымам самаабвешчанага прэзідэнта Лукашэнкі”.

“Барацьба за Дзень Волі — важны крок у працэсе барацьбы за свабодную Беларусь, якая з’яўляецца імкненнем беларускага народа, і пастаянным страхам крывавага дыктатара пры ўладзе”, — гаворыцца ў заяве.

Аб’яднанне заклікала ўрады і парламенты сусветных дэмакратый падтрымаць барацьбу беларускага народа за сваю свабоду. На думку Ганчарэнкі, “калі Лукашэнку будуць судзіць у [Міжнародным крымінальным судзе] у Гаазе, беларускія гарады зноў адкрыта будуць святкаваць Дзень Волі з бел-чырвона-белай сімволікай”.

МФА было ўтворана 30 чэрвеня 2020 года, са слоў дэпутата, дзеля таго, каб “дапамагчы беларусам стварыць дэмакратычную, свабодную і сапраўды незалежную дзяржаву”. “Мы зробім усё магчымае, каб інфармаваць міжнародныя арганізацыі аб сітуацыі ў Беларусі, дапамагаць беларускім палітычным зняволеным і звычайным людзям выйсці на волю”, — адзначыў Ганчарэнка.

25 сакавіка прыхільнікі дэмакратычнай Беларусі адзначаюць Дзень Волі — гадавіну абвяшчэння незалежнасці Беларускай Народнай Рэспублікі. У Беларусі афіцыйна гэтага свята няма.

Пасля прэзідэнцкіх выбараў 2020 года любыя спробы публічна адзначыць Дзень Волі ўнутры краіны прыводзяць да затрыманняў і судоў як мінімум па адміністрацыйных абвінавачваннях.