Мінск 16:34

У другім чытанні прынятыя законапраект аб рэспубліканскім бюджэце на 2027 год і змены ў Падатковы кодэкс

Ілюстрацыйнае фота: прэс-служба Палаты прадстаўнікоў Нацыянальнага сходу

17 лістапада, Позірк. Законапраект аб рэспубліканскім бюджэце на 2027 год, а таксама змены ў Падатковы кодэкс 17 лістапада прынятыя ў другім чытанні, паведамляе прэс-служба Палаты прадстаўнікоў Нацыянальнага сходу (ПП НС).

30 кастрычніка дэпутаты ПП НС прынялі праект закона аб бюджэце ў першым чытанні. Згодна з дакументам, даходы прадугледжваюцца ў памеры 58 млрд 903,8 млн рублёў, што на 3,5% вышэй за ацэнку паступленняў 2026 года, выдаткі — 60 млрд 834,6 млн рублёў. Такім чынам, чаканы дэфіцыт рэспубліканскага бюджэту на гэты момант складае 1 млрд 930,8 млн рублёў.

У параўнанні з мінулым годам чакаецца павелічэнне выдаткаў на судовую ўладу, “праваахоўную дзейнасць і забеспячэнне бяспекі” на 770 млн рублёў (агульная сума дасягне 7,47 млрд рублёў).

Найбольшы рост у гэтым раздзеле датычыцца выдаткаў на органы ўнутраных спраў (+265 млн рублёў) і пагранічнай службы (+93 млн), органы і падраздзяленні па надзвычайных сітуацыях (+80,7 млн) і органы дзяржаўнай бяспекі (+70,2 млн).

Выдаткі на нацыянальную эканоміку на 2027 год плануюцца ў памеры 10,25 млрд рублёў (+700 млн), нацыянальную абарону — 5,19 млрд рублёў (+670 млн), сацыяльную палітыку — 3,99 млрд рублёў (+320 млн, з іх на пенсійнае забеспячэнне — 2,85 млрд рублёў, +250 млн), ахову здароўя — 3,89 млрд рублёў (+590 млн), адукацыю — 2,97 млрд рублёў (+440 млн).

Рэспубліканскі бюджэт на 2025 год з улікам унесеных змен быў выкананы наступным чынам: даходы — 50,4 млрд рублёў, выдаткі — 52,4 млрд, дэфіцыт — 2 млрд; на 2026-ы зацверджаны з дэфіцытам у 4 млрд 348,9 млн рублёў: даходы — 54 млрд 384,3 млн; выдаткі — 58 млрд 733,2 млн.

Прадстаўляючы ў другім чытанні законапраект аб змяненні Падатковага кодэкса, член пастаяннай камісіі па бюджэце і фінансах Наталля Куляшова адзначыла, што ён “не прадугледжвае радыкальнага перагляду падатковай сістэмы”.

Паводле яе слоў, у дакуменце закладзеныя асобныя мэтанакіраваныя карэктаванні, якія тычацца адміністравання, індэксацыі падатковых ставак, змянення тэрмінаў выканання абавязацельстваў.

Дэпутат паведаміла, што да другога чытання “рэдакцыйна скарэктаваныя” нормы пра наданне льготы па падаходным падатку ў дачыненні да грашовых сродкаў, якія збіраюцца на лячэнне грамадзян, — яны прыведзеныя ў адпаведнасць з указам № 304 ад 7 верасня 2026 года “Аб фондах і дабрачыннай дзейнасці ў сферы аховы здароўя”.

Акрамя таго, быў дапрацаваны парадак вызначэння падатковай базы падаходнага падатку пры атрыманні фізічнымі асобамі даходаў ад платнага адчужэння нерухомай маёмасці ў рамках сумеснай уласнасці.

Абодва прынятыя ПП НС дакументы будуць накіраваныя для ўхвалення ў Савет Рэспублікі. Пасля станоўчага рашэння — на зацвярджэнне Аляксандру Лукашэнку.

Падзяліцца: