Лукашэнка падпісаў указ аб дабрачыннасці ў ахове здароўя

7 верасня, Позірк. Указ “Аб фондах і дабрачыннай дзейнасці ў сферы аховы здароўя” падпісаў 7 верасня Аляксандр Лукашэнка, паведамляе яго прэс-служба.

Дакумент, як заяўляецца, рэгулюе адносіны ў гэтай сферы і “актуалізуе агульныя палажэнні аб фондах”.

Адзначаецца, што дакументам замацавана “вызначэнне дабрачыннай дзейнасці ў сферы аховы здароўя”, а таксама “кола асоб, якія ўдзельнічаюць у яе арганізацыі і фінансаванні”.

“Устаноўлены парадак збору грашовых сродкаў на аказанне медыцынскай дапамогі і іх мэтавага расходавання, а таксама распараджэння сродкамі, якія паступілі на дабрачынныя рахункі звыш ліміту або пакінутыя незапатрабаванымі. Прадугледжаны механізм кантролю за рухам і мэтавым выкарыстаннем збіраных грашовых сродкаў”, — гаворыцца ў паведамленні.

Зацверджана таксама новая рэдакцыя “палажэння аб стварэнні, дзейнасці і ліквідацыі фондаў у сферы аховы здароўя”. У прыватнасці, удвая павялічваецца мінімальны памер маёмасці, неабходнай для іх стварэння і дзейнасці.

“Вызначаныя памеры расходаў фонду на аплату працы і іншых выплат яго работнікам, на ажыццяўленне прадпрымальніцкай дзейнасці. Пры гэтым забараняецца выкарыстанне для такой дзейнасці ахвяраванняў грамадзян і юрыдычных асоб”, — паведамляе прэс-служба аўтара ўказа.

Сцвярджаецца, што рэалізацыя ўказа “дасць магчымасць выключыць нямэтавае выкарыстанне сабраных сродкаў, павысіць празрыстасць працы фондаў і эфектыўнасць кантролю за імі, а таксама ўпарадкаваць дабрачынную дзейнасць у сферы аховы здароўя”.

Гл. таксама:

МУС паведаміла пра затрыманне “блогераў-аферыстаў”, якія патрацілі на забавы грошы, сабраныя для хворага дзіцяці