У Гомельскай вобласці МНС, якая мяжуе з Украінай, праверыць сістэму апавяшчэння

20 жніўня, Позірк. У Гомельскай вобласці 20 жніўня пройдзе “планавая тэхнічная праверка сістэмы абвесткі насельніцтва”, паведаміў начальнік сектара сувязі і абвесткі абласнога ўпраўлення МНС Міхаіл Савянкоў.

Паводле яго слоў, якія прыводзіць рэгіянальнае ўпраўленне ведамства, гэта робіцца з мэтай “падтрымання абсталявання ў спраўным стане”.

Пры праверках на працягу каля хвіліны будзе гучаць сірэна. Ніякіх дзеянняў ад насельніцтва не патрабуецца.

Як адзначаецца, у экстраных выпадках сістэма будзе працаваць 2,5-3 хвіліны. Рашэнне аб уключэнні сірэн у такім рэжыме “прымаецца на падставе інфармацыі, якая паступіла ў цэнтр аператыўнага кіравання МНС”, заявіў Савянкоў. Ён падкрэсліў, што пры неабходнасці насельніцтву даводзяцца дакладныя інструкцыі праз радыё, СМС-рассылку, СМІ і афіцыйныя тэлеграм-каналы.

28 ліпеня 13-я “планавая тэхнічная праверка сістэмы апавяшчэння насельніцтва“ прайшла ў Брэсцкай вобласці.

Брэсцкая вобласць, якая мяжуе з Украінай і Польшчай, з’яўляецца лідарам па колькасці праверак сістэмы абвесткі ў 2026 годзе. Раней трывожны сігнал правяралі 13 і 27 студзеня, 10 і 24 лютага, 10 і 24 сакавіка, 14 і 28 красавіка, 12 і 26 мая, 9 чэрвеня і 14 ліпеня.

У памежнай з Расіяй і Украінай Гомельскай вобласці праверкі праводзяцца штомесяц (22 студзеня, 26 Лютага, 19 сакавіка, 16 красавіка, 28 траўня, 18 чэрвеня, 16 ліпеня).

У астатніх рэгіёнах сістэма выпрабоўваецца значна радзей. 26 сакавіка была праведзена агульнарэспубліканская праверка.

У Беларусі фіксуюцца выпадкі залёту і падзення дронаў, аднак інфармацыі пра тое, што пры гэтым актывуецца сістэма абвесткі, няма.