9 жніўня фасад Палаца культуры і навукі ў Варшаве зноў будзе падсвечаны бел-чырвона-белымі колерамі
29 ліпеня, Позірк. 9 жніўня, у шостую гадавіну прэзідэнцкіх выбараў 2020 года ў Беларусі, фасад Палаца культуры і навукі ў Варшаве з 18:00 да 24:00 будзе падсветлены бел-чырвона-белымі колерамі, паведамляе Аб’яднаны пераходны кабінет (АПК).
Адзначаецца, што рашэнне прыняў прэзідэнт Варшавы Рафал Тшаскоўскі ў адказ на зварот намесніка кіраўніка АПК Паўла Латушкі.
“Дзякуючы такой увазе АПК адчувае, што тэма свабоднай Беларусі застаецца важнай для Польшчы і Варшавы”, — адзначыў у сувязі з гэтым Латушка.
“Мы глыбока цэнім тую падтрымку, якую Польшча надае беларускаму народу на працягу гэтых шасці гадоў — найбольш цяжкіх і цёмных старонак у гісторыі незалежнай Беларусі. У часы, калі беларусы штодзень сутыкаюцца з беспрэцэдэнтнымі рэпрэсіямі, маштаб якіх не змяншаецца, Польшча і польскі народ паказалі, што значыць быць сапраўдным суседам. Вельмі спадзяюся, што Польшча і надалей будзе заставацца нашым надзейным саюзнікам на шляху да пабудовы свабоднай і дэмакратычнай Беларусі”, — падкрэсліў палітык.
У апошнія гады Палац культуры і навукі ў цэнтры Варшавы рэгулярна падсвечваецца бел-чырвона-белымі колерамі на знак салідарнасці з беларускім народам. Папярэдні раз гэта адбылося ў Дзень Волі 25 сакавіка 2026 года.
