Лукашэнка адправіўся з візітам у РФ, анансаваная сустрэча з Пуціным

26 чэрвеня, Позірк. З рабочым візітам у Расію адправіўся 26 чэрвеня Аляксандр Лукашэнка, паведамляе яго прэс-служба.

Анансавана, што 26 чэрвеня адбудзецца сустрэча візіцёра з прэзідэнтам РФ Уладзімірам Пуціным.

“Плануецца, што кіраўнікі дзяржаў абмяркуюць ключавыя пытанні ў парадку дня беларуска-расійскага супрацоўніцтва, абстаноўку ў рэгіёне і свеце”, — гаворыцца ў паведамленні.

Тэрміны візіту не называюцца.

Лукашэнка 23 чэрвеня анансаваў чарговую сустрэчу з Пуціным і сваю “працяглую камандзіроўку”, не назваўшы кірунак.

Заява супала па часе з перыядам ультыматуму Мінску з боку прэзідэнта Украіны Уладзіміра Зяленскага.

19 чэрвеня ён даў Лукашэнку тыдзень на зняцце з вышак рэтранслятараў для навядзення дронаў уздоўж мяжы з Украінай: “Калі ён гэта не зробіць, зробім мы”. Палітык таксама заклікаў спыніць пастаўку нафтапрадуктаў расійскай арміі.

На наступны дзень у звароце да суайчыннікаў ён заявіў, што Украіне вядома “аб чатырох такіх рэтранслятарах у Беларусі — у Гомельскай і Брэсцкай абласцях”, і паўтарыў, што ў Беларусі “ёсць час, каб дэмантаваць гэтае абсталяванне”.

24 чэрвеня Зяленскі інфармаваў, што абсталяванне спыніла працу двума днямі раней: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі ўважліва сачу і штодзённыя даклады атрымліваю. Факт, што рэтранслятары на сёння не працуюць”.