Расія не ўпусціла з Беларусі чарговую партыю еўрапейскага корму для непрадуктыўных жывёл

28 траўня, Позірк. Аб вяртанні 3,7 т корму, які ўвозіўся з тэрыторыі Беларусі для непрадуктыўных жывёл, паведаміла Паўночна-Заходняе ўпраўленне Федэральнай службы па ветэрынарным і фітасанітарным наглядзе (Рассельгаснагляд).

Прадукцыя вернутая пасля ветэрынарнага кантролю на расійска-беларускай мяжы пры ўездзе ў Пскоўскую вобласць.

“Было ўстаноўлена, што на корм, які перавозіцца, адсутнічаюць ветэрынарныя суправаджальныя дакументы, што пацвярджаюць бяспеку тавару і яго паходжанне. Акрамя таго, з 23 ліпеня 2020 года прыпыненая сертыфікацыя ў РФ прадукцыі (корму для непрадуктыўных жывёл) вытворчасці галандскага прадпрыемства, заяўленага на маркіроўцы“, — сказана ў рэлізе.

Аб вяртанні ў Беларусь італьянскага корму для непрадуктыўных жывёл Рассельгаснагляд паведамляў 30 красавіка, сербскага — 16 красавіка (другі выпадак у аднаго і таго ж перавозчыка).