25 траўня, Позірк. “Тэлефонныя аферысты” выцягнулі з 18-гадовай жыхаркі Віцебска персанальныя звесткі паводле схемы “замена дамафона”, паведамляе Міністэрства ўнутраных спраў.
Пасля з ёй звязалася жанчына, якая прадставілася супрацоўніцай “дзяржінспекцыі па электрасувязі”, і заявіла, што дзяўчына размаўляла з аферыстамі, якія ад яе імя праводзяць незаконныя фінансавыя аперацыі. Каб пазбегнуць “прыцягнення да крымінальнай адказнасці”, тая нібыта абавязаная “атрымаць станоўчую характарыстыку ад КДК”. Для гэтага ёй трэба выконваць заданні па перавозцы пасылак.
Паводле інфармацыі ведамства, дзяўчына забрала ў двух іншых грамадзян ашчаджэнні і збіралася вывезці іх “у суседнюю краіну для перадачы куратарам”. Яе затрымалі на чыгуначным вакзале ў Оршы (Віцебская вобласць). Пры ёй знойдзена і вынята звыш 60 тыс. рублёў.
МУС падкрэслівае, што праваахоўнікі, работнікі банкаўскіх ды іншых устаноў не тэлефануюць грамадзянам у мэсэнджарах. Калі невядомыя па тэлефоне патрабуюць здзейсніць якія-небудзь маніпуляцыі з фінансамі (задэклараваць, пакласці на бяспечны рахунак, аддаць кур’еру і г.д.), трэба неадкладна спыніць размову і паведаміць пра гэта ў міліцыю.
Напярэдадні паведамлялася, што за 23 траўня ў міліцыю паступіла каля 300 паведамленняў пра званкі тэлефонных ашуканцаў.
“Дзякуючы аператыўнасці супрацоўнікаў органаў унутраных спраў і пільнасці грамадзян пераважная большасць злачынстваў прадухіленая! Зарэгістравана 25 злачынстваў, здзейсненых з выкарыстаннем інфармацыйна-камунікацыйных тэхналогій”, — адзначала МУС.
Заблакаваная магчымасць “здзяйснення плацяжоў на адрас 78 замежных плацежных рэквізітаў, якія выкарыстоўваюцца зламыснікамі”.
Затрымана чацвёра кур’ераў, якія працавалі “ў інтарэсах аферыстаў”, у іх ліку двое замежнікаў, у затрыманых вынята каля 30 тыс. рублёў.
