Лукашэнка і Пуцін абмеркавалі па тэлефоне супрацу ў галіне эканомікі і абароны

15 траўня, Позірк. Пытанні эканомікі і абароны абмеркавалі па тэлефоне 15 траўня прэзідэнт Расіі Уладзімір Пуцін і Аляксандр Лукашэнка, паведаміла прэс-служба апошняга.

Адзначаецца, што суразмоўцы таксама закранулі “будучыя сумесныя мерапрыемствы па гэтых кірунках”.

Тыдзень таму Лукашэнка наведваў Маскву для ўдзелу ў мерапрыемствах з нагоды Дня Перамогі. У рамках візіту таксама адбылася яго асабістая сустрэча з Пуціным.

13 траўня прэс-служба беларускага ўрада паведаміла пра чарговую тэлефонную размову прэм’ер-міністра Беларусі Аляксандра Турчына і яго расійскага калегі Міхаіла Мішусціна. Бакі “абмеркавалі актуальныя пытанні двухбаковага парадку дня ў развіццё дамоўленасцяў” Лукашэнкі і Пуціна пра “нарошчванне беларуска-расійскай гандлёва-эканамічнай і навукова-тэхналагічнай супрацы, дасягнутых на перагаворах 8 траўня 2026 года ў Маскве”.

Суразмоўцы таксама “пацвердзілі важнасць актывізацыі інтэграцыйнага ўзаемадзеяння ў Саюзнай дзяржаве і Еўразійскім эканамічным саюзе”.

Раней Турчын і Мішусцін размаўлялі па тэлефоне 4 траўня. Тады паведамлялася, што кіраўнікі ўрадаў абмеркавалі “актуальныя пытанні беларуска-расійскай гандлёва-эканамічнай і навукова-тэхналагічнай супрацы”.

На наступны дзень, 5 траўня, Лукашэнка заслухаў даклад Турчына. Прэс-служба ўрада адзначыла, што на сустрэчы палітыкаў абмяркоўвалася парадак дня будучых перагавораў Лукашэнкі з прэзідэнтам РФ.

Перад змястоўнай часткай перагавораў з Пуціным увечары 8 траўня ў расійскай сталіцы Лукашэнка заявіў, што ім трэба будзе абмеркаваць “паўтара пытання”. “Мы асноўны партнёр на постсавецкай прасторы ў гандлі. Вядома, пры такіх вялізных аб’ёмах, пад 60 млрд долараў, заўсёды будуць нейкія праблемы. Але мы неяк прыстойна жывем гэтыя гады. Мы ніколі не мелі нейкіх сур’ёзных спрэчак, якія мы абмяркоўваем і даручаем урадам разруліць”, — сказаў ён у пратакольнай частцы сустрэчы.