Урад зацвердзіў пагадненне з Азербайджанам аб узаемным прызнанні правоў кіроўцаў

14 траўня, Позірк. Пагадненне паміж урадамі Беларусі і Азербайджана аб узаемным прызнанні пасведчанняў кіроўцаў зацвердзіў 14 траўня Савет міністраў.

Адпаведную пастанову падпісаў прэм’ер-міністр Аляксандр Турчын, паведамляе прэс-служба ўрада.

Дакумент таксама замацоўвае права грамадзян дзвюх краін абменьваць правы кіроўцы “без здачы адпаведных тэарэтычных і практычных выпрабаванняў пасля выдачы дазволу на пастаяннае пражыванне“.

Пагадненне аб узаемным прызнанні і абмене пасведчанняў кіроўцы, а таксама пратакол аб узаемадзеянні паміж міністэрствамі ўнутраных спраў Беларусі і Азербайджана на 2026–2028 гады падпісалі 16 студзеня ў Баку кіраўнікі гэтых ведамстваў — Іван Кубракоў і Вілаят Эйвазаў.

Паводле інфармацыі прэс-службы беларускага ведамства, Кубракоў на перамовах з азербайджанскім калегам прапанаваў развіваць супрацоўніцтва ў галіне ўзаемнага навучання, перападрыхтоўкі і павышэння кваліфікацыі супрацоўнікаў; тэхналагічнае і вытворчае ўзаемадзеянне, “уключаючы магчымасці беларускага абаронна-прамысловага комплексу“.