Беларускі лыжнік Раман Свірыдзенка выйграў другі медаль на Паралімпіядзе
11 сакавіка, Позірк. Беларускі лыжнік Раман Свірыдзенка 11 сакавіка выйграў серабро ў гонцы з раздзельным стартам на Паралімпійскіх гульнях, паведаміла Міністэрства спорту і турызму.
Адзначаецца, што на дыстанцыі 10 км ён паказаў другі час, саступіўшы 27,7 секунды французу Карлу Табурэ. Бронза дасталася прадстаўніку Канады, які саступіў Свірыдзенку 20,9 секунды. Усяго на старт выйшлі 25 лыжнікаў, фінішавалі 23.
У жаночай індывідуальнай гонцы на 10 км у класах LW10-LW12 (сядзячыя атлеты) беларуска Лідзія Лобан з часам 30 хвілін 7,9 секунды стала 11-й, а яе суайчынніца Валянціна Бірыла — 14-й (30:53,1).
Беларуска Дар’я Федзьковіч, якая выступае ў класах LW2-LW9 (стаячыя атлеты з паразамі канечнасцяў) сярод жанчын, пераадолела дыстанцыю за 40 хвілін 20,6 секунды і стала 10-й.
10 сакавіка Свірыдзенка выйграў на Паралімпіядзе залаты медаль у спрынце класічным стылем.
Беларускія спартсмены прадстаўленыя на спаборніцтвах толькі ў лыжных гонках.
Нацыянальны алімпійскі камітэт раней паведамляў, што 14 сакавіка яны возьмуць удзел у эстафетах (відавочна, гаворка пра жаночую каманду), 15 сакавіка пройдуць гонкі з раздзельным стартам вольным стылем на 20 км.
Пасля другога медаля Свірыдзенка, Беларусь па-ранейшаму займае 16-е месца ў агульным медальным заліку Паралімпіяды, лідарства захоўвае Кітай.
Шэраг краін байкатавалі цырымонію адкрыцця Паралімпіяды ў знак пратэсту супраць допуску да спаборніцтваў з дзяржсімволікай спартсменаў з Беларусі і РФ.
Паралімпійскія гульні праходзяць у Мілане і Карціна-д’Ампеца (Італія) з 6 па 15 сакавіка.
