Атручэнне дзяцей здарылася ў 11 дзіцячых садках Барысава — Міністэрства аховы здароўя
4 чэрвеня, Позірк. Атручэнне дзяцей здарылася ў 11 дзіцячых садках Барысава (Мінская вобласць), вынікае з паведамлення Міністэрства аховы здароўя.
Паводле інфармацыі ведамства, з 19:40 2 чэрвеня да 14:00 3 чэрвеня ў прыёмнае аддзяленне інфекцыйнай бальніцы паступіла 30 дзяцей ва ўзросце ад 2 гадоў 8 месяцаў да 8 гадоў са скаргамі на “шматразовыя ваніты (да 10 разоў), болі ў жываце і слабасць”.
Было шпіталізавана 27 дзяцей з папярэднім дыягназам “востры гастраэнтэрыт”. Стан на момант паступлення ацэньвалася як сярэдняй ступені цяжкасці. У трох выпадках бацькі аформілі пісьмовую адмову ад афармлення ў бальніцу. Дзеці забяспечаны лячэннем дома, гаворыцца ў паведамленні.
Пацыенты былі “неадкладна агледжаныя лекарамі-інфекцыяністамі (уключаючы кансультацыю хірурга для выключэння вострай хірургічнай паталогіі)”.
“Прызначанае поўнае клініка-лабараторнае абследаванне і пачата лячэнне ў строгай адпаведнасці з зацверджанымі клінічнымі пратаколамі. <…> Па стане на 18:00 3 чэрвеня 8 дзяцей выпісана”, — адзначыла Міністэрства аховы здароўя, падкрэсліўшы, што сітуацыя знаходзіцца на кантролі ведамства. Ва ўсіх шпіталізаваных дзяцей “адзначаецца ўстойлівая станоўчая дынаміка”.
“Для высвятлення прычын захворвання санітарна-эпідэміялагічнай службай праводзіцца санітарна-эпідэміялагічнае расследаванне”, — паведаміла міністэрства.
Напярэдадні стала вядома, што на даручэнне Генеральнай пракуратуры Следчы камітэт праводзіць праверку па факце масавага атручвання дзяцей.
3 чэрвеня дзяржСМІ паведамілі, што 27 дзяцей дашкольнага ўзросту з млоснасцю і ванітамі дастаўлена напярэдадні вечарам у інфекцыйнае аддзяленне Барысаўскай цэнтральнай раённай бальніцы.
Галоўны дзяржаўны санітарны ўрач Мінскай вобласці Аляксандр Тарасенка заявіў, што сітуацыя стабільная, а дзеці знаходзяцца ў здавальняючым стане.
