МУС паведаміла пра затрыманне “блогераў-аферыстаў”, якія выдаткавалі на забавы грошы, сабраныя для хворага дзіцяці

4 лістапада, Позірк. Пра затрыманне ў Гродзенскай вобласці “блогераў-аферыстаў” паведамляе Міністэрства ўнутраных спраў.

Адзначаецца, што затрыманы 17-гадовы жыхар абласнога цэнтра і “яго 37-гадовая служыцельніца”.

“Устаноўлена: фігуранты збіралі сродкі на лячэнне цяжкахворага дзіцяці. Падпісчыкам за 10 рублёў прысвойвалі нумары ўдзельнікаў розыгрышу, прызамі ў якім былі смартфоны або аўтамабіль. Арганізатары заяўлялі, што толькі невялікая частка атрыманых грошай будзе накіравана на куплю падарункаў, а ўсю астатнюю суму перададуць на лячэнне хлопчыка! З сабраных 1,5 млн рублёў, паводле слоў фігуранта, толькі 200 тыс. аддалі маці дзіцяці, 315 тыс. патрацілі на падарункі для ўдзельнікаў стрыму”, — гаворыцца ў паведамленні.

“Астатняя сума (каля мільёна рублёў) выдаткавана на “прыгожае жыццё”: паездкі ў прэміяльныя туры на Мальдывы і ў ААЭ, арэнду элітнага жылля, азартныя гульні і іншыя забавы”, — адзначае ведамства.

Распачата крымінальная справа за “махлярства ў асабліва буйным памеры”. Затрыманым пагражае да 12 гадоў пазбаўлення волі, падкрэслілі ў МУС.