Літва адкрыла мяжу з Беларуссю (дапоўнена)

25 кастрычніка, Позірк. Апоўдні 25 кастрычніка Літва аднавіла пропуск транспартных сродкаў на мяжы з Беларуссю, вынікае з паведамлення літоўскай Службы аховы дзяржаўнай мяжы (САДМ).

“З 12 гадзін дня суботы на падставе рашэння кіраўніка Службы аховы дзяржаўнай мяжы Літвы Рустама Любаева была адноўлена праверка і пропуск асоб і транспартных сродкаў праз кантрольна-прапускныя пункты Мядзінінкай і Шальчынінкай на мяжы з Беларуссю, — заявіла ведамства. — Такое рашэнне было прынятае пасля ацэнкі сітуацыі і наяўнай інфармацыі з пункту гледжання бяспекі”.

САДМ адзначыла, што прынятае напярэдадні ўвечвары рашэнне прыпыніць рух праз мяжу ў абодвух напрамках, было скіраванае на “гарантаванне бяспекі Літвы, звязанае з паветранымі шарамі, якія заляцелі ў Літву з Беларусі ўвечары ў пятніцу”.

“За больш чым паўсутак, пакуль пункты Мядзінінкай і Шальчынінкай былі закрытыя, паводле папярэдніх звестак, у іх раёне не было зафіксавана асаблівых інцыдэнтаў або канфліктаў паміж кіроўцамі, якія чакалі пропуску”, — гаворыцца ў паведамленні.

Паводле даных Дзяржаўнага пагранічнага камітэта Беларусі, на 12:00 25 кастрычніка ў электроннай чарзе пункта пропуску Каменны Лог (з літоўскага боку Мядзінінкай) было 840 грузавікоў, 90 легкавых аўтамабіляў і 15 аўтобусаў, у чарзе пункта Беняконі (Шальчынінкай) — 750 фур і 80 легкавых аўто.

Як паведамляў “Позірк”, 24 кастрычніка ў 21:30 Літва зноў закрыла мяжу з Беларуссю — праз прылёт паветраных шароў з беларускага боку. Адкрыць мяжу планавалася апоўдні 25 кастрычніка, што і адбылося.

Праз з’яўленне аэрастатаў закрываліся аэрапорты Вільнюса і Каўнаса, самалёты перанакіроўвалі ў Палангу (Літва), Рыгу (Латвія), Катовіцэ, Гданьск (Польшча).

Паводле інфармацыі прэм’ер-міністра краіны Інгі Ругінене, з Беларусі ў Літву “зноў была запушчана вялікая група кантрабандных метэазондаў”.

“Службы працуюць у адпаведнасці з рашэннямі, прынятымі на пасяджэнні Камісіі нацыянальнай бяспекі на гэтым тыдні. Камісія зноў збярэцца на наступным тыдні, каб ацаніць наступствы ўжо прынятых рашэнняў і абмеркаваць, якія яшчэ захады можна зрабіць у кароткатэрміновай перспектыве, каб нанесці шкоду як кантрабандыстам, так і рэжыму Лукашэнкі, які дазваляе ім бясчынстваваць”, — паведаміла кіраўніца кабінета.

Паводле яе слоў, цяпер самае галоўнае — не дапусціць пагрозы насельніцтву Літвы, таму прымаюцца адпаведныя рашэнні.

Упершыню мяжу з Беларуссю праз зонды Літва закрыла ўначы 22 кастрычніка. Транспартныя сродкі не афармляліся да раніцы.

Галоўны дарадца прэзідэнта Літвы Дэйвідас Матулёніс заявіў, што мяжа можа быць закрытая на больш працяглы тэрмін.