Страты вільнюскага аэрапорта праз залёт з Беларусі аэрастатаў з кантрабанднымі цыгарэтамі склалі амаль 15 тыс. еўра

12 кастрычніка, Позірк. 14,5 тыс. еўра склалі прамыя страты аэрапорта ў Вільнюсе праз залёт з Беларусі ў ноч на 5 кастрычніка аэрастатаў з кантрабанднымі цыгарэтамі, паведамляе партал Delfi.

Страты панесеныя праз “часовае закрыццё паветранай прасторы”, адзначае выданне.

“Закрыццё аэрапорта закранула амаль 5.000 пасажыраў і 30 рэйсаў, з якіх 14 былі скасаваныя”, — заявіла прадстаўніца дзяржаўнай кампаніі “Літоўскія аэрапорты” Віталія Рочэ.

Пры гэтым, як адзначаецца, страты панеслі таксама “авіякампаніі, кампаніі наземнага абслугоўвання і самі пасажыры”.

“Часовае закрыццё вільнюскага аэрапорта пацягнула страты для ўсіх удзельнікаў авіяцыйнага ланцужка”, — падкрэсліла Рочэ.

Раней “Позірк” са спасылкай на польскія СМІ паведаміў, што ў ноч на 5 кастрычніка ў выніку “масавай акцыі беларускіх кантрабандыстаў” у Літву і Польшчу заляцела не менш за 26 паветраных шароў з цыгарэтамі. Адзін з іх упаў на польскай тэрыторыі, астатнія апынуліся на літоўскай. Аэрастаты, якія да таго моманту былі знойдзеныя ў Літве, транспартавалі 12 тыс. пачкаў згаданай тытунёвай прадукцыі.

Прадстаўнік Нацыянальнага цэнтра кіравання ў крызісных сітуацыях (НЦККС) Дарус Бута адзначыў, што да 14 шароў, якія прыбылі з Беларусі, было заўважана ў Вільнюсе і прысталічным раёне, два — над вільнюскім аэрапортам.

Праз гэта праца аэрапорта прыпынялася. Адны рэйсы былі адкладзеныя, іншыя адмененыя.

Кантрабандысты рэгулярна выкарыстоўваюць паветраныя шары для перапраўкі цыгарэт з Беларусі ў сумежныя краіны ЕС. Паводле звестак Службы аховы дзяржаўнай мяжы Літвы, 45,5% кантрабандных цыгарэт сёлета дастаўлена ў краіну з Беларусі, 54,1% — з Латвіі.

Літоўскія ўлады абмяркоўваюць магчымасць узмацніць адказнасць за незаконнае захоўванне цыгарэт. Згодна з дзейным літоўскім заканадаўствам, крымінальная адказнасць наступае пры захоўванні не менш за 1,5 тыс. пачкаў кантрабандных цыгарэт. Часцяком нелегальна транспартуюцца менавіта такія партыі тытунёвай прадукцыі — каб пазбегнуць крымінальных абвінавачванняў.

У 2025 годзе ў Літве абвінавачванні выстаўленыя толькі 34 з 96 затрыманых за кантрабанду цыгарэт.