Туск сустрэўся з Ціханоўскай і выказаўся пра Беларусь на саміце ў Капенгагене

2 кастрычніка, Позірк. “Прымаючы пад увагу правакацыі з боку Расіі і Беларусі, якія назіраюцца ў Польшчы, для мяне відавочна, што тое, што адбываецца цяпер у Еўропе, з’яўляецца вайной”, — заявіў на саміце Еўрапейскай палітычнай супольнасці ў Капенгагене прэм’ер-міністр Польшчы Дональд Туск.

Ён заклікаў еўрапейскіх лідараў “пазбавіцца ад ілюзій”, адзначыўшы, што некаторыя з іх “называюць гэта поўнамаштабнай агрэсіяй, інцыдэнтам, правакацыяй, але гэта — вайна”.

“Амаль кожны дзень у нас адбываюцца правакацыі на мяжы з Беларуссю. Вайна для нас не з’яўляецца абстрактнай, на мяжы з Беларуссю ў нас больш за 100 спробаў амаль штодня, з ужываннем фізічнага гвалту ў дачыненні да салдат на нашай мяжы. Гэта цяпер наша штодзённая руціна”, — заявіў Туск, адзначыўшы, што нелегальная міграцыя “вельмі добра арганізаваная Пуціным і Лукашэнкам”.

Паводле інфармацыі на старонцы канцылярыі прэм’ер-міністра Польшчы ў сетцы Х, на палях саміту ў Капенгагене ён правёў сустрэчу з беларускім дэмакратычным лідарам Святланай Ціханоўскай. Падрабязнасці сустрэчы не прыводзяцца.

Пра тое, што Ціханоўская ўдзельнічае ў VII саміце Еўрапейскай палітычнай супольнасці 2 кастрычніка ў Капенгагене, раней паведаміў “Позірку” галоўны дарадца дэмлідара Франак Вячорка.

У сталіцу Даніі прыбыло каля 50 кіраўнікоў дзяржаў і ўрадаў, прадстаўнікі міжнародных арганізацый. Паводле слоў Вячоркі, Ціханоўская ўдзельнічае ў саміце па запрашэнні прэм’ер-міністра Даніі Метэ Фрэдэрыксен і прэзідэнта Еўрапейскага савета Антоніу Кошты.

Асноўныя тэмы мерапрыемства — Украіна, бяспека і міграцыя.