Мінабароны пад песню прыхільніка расійскай агрэсіі Газманава анансавала правядзенне форуму блогераў

25 верасня, Позірк. Правядзенне II Форуму блогераў Беларусі “БлогБай.Сіла ў праўдзе” анансавала Міністэрства абароны.

Мерапрыемства пройдзе на базе Ваеннай акадэміі.

“На тое, каб весці блог, у курсантаў звычайна не хапае часу. Але гэта не перашкодзіла ім зачапіць гледача саюзнага маштабу”, — заяўляе ведамства.

Адзначаецца, што “хлопцы з вайскова-транспартнага факультэта ў БелДУТ паўтарылі вірусны танец народнага артыста Расіі Алега Газманава”.

“Алег Міхайлавіч чэлендж ацаніў!” — сцвярджае Мінабароны.

У відэа, апублікаваным у тэлеграм-канале міністэрства, курсанты выконваюць танец пад песню згаданага расійскага выканаўцы.

“Цяпер чакаем выкліку ад паважанага Аляксандра Саладухі”, — гаворыцца ў паведамленні.

Форум працягнецца тры дні, на працягу якіх, як заяўляецца, “блогераў чакае насычаная праграма: майстар-класы ад вядучых медыяэкспертаў, навучальныя лекцыі, стварэнне ўнікальнага кантэнту”.

“Бонус-трэк для блогераў ад вайскоўцаў — абкатка танкам, заняткі па агнявой падрыхтоўцы, назіранне за баявой падрыхтоўкай курсантаў”, — паведамляе ведамства.

74-гадовы Газманаў — аўтар песень і выканаўца, прыхільнік палітыкі прэзідэнта РФ Уладзіміра Пуціна. Падтрымлівае расійскую агрэсію ва Украіне. Знаходзіцца пад санкцыямі ЕС і шэрагу дэмакратычных краін.