Міністр інфармацыі патлумачыў існаванне спісу забароненых кніг барацьбой з прапагандай вычварэнстваў

17 верасня, Позірк. Спіс забароненых да распаўсюджвання кніг — гэта “не цэнзура ў класічным разуменні, а аналаг санітарнага кантролю і прышчэпкі адначасова”, заявіў міністр інфармацыі Марат Маркаў 17 верасня.

“Мы проста не прапускаем на паліцы нашай інфармацыйнай прасторы ўсякі бруд”, — прыводзіць ведамства словы Маркава.

Паводле яго сцвярджэння, спіс складаецца з выданняў, якія “заклікаюць да вельмі небяспечных, незаконных ці нават проста агідных з маральнага пункту гледжання рэчаў”.

“Пытанне не ў тым, каб пазбаўляць права выбару. Пытанне ў тым, каб засцерагчы людзей ад чытва, якое працуе як інфармацыйная атрута, маніпулюючы свядомасцю і разбураючы нашы традыцыйныя каштоўнасці”, — сказаў Маркаў.

Чыноўнік сцвярджае, што ўлада такім чынам “не забараняе думаць”, а, “наадварот, агароджвае ад мэтанакіраванага прамывання мазгоў”.

“Калі гаворка ідзе аб абароне нацыянальнага культурнага кода і псіхічнага здароўя нацыі, дзяржава не можа заставацца ўбаку і спадзявацца толькі на тое, што кожны самастойна адфільтруе прапаганду гвалту, нянавісці ці вычварэнстваў”, — заявіў ён.

Кіраўнік ведамства прызнае, што “ў сучасным свеце тэхнічна немагчыма поўнасцю сцерці інфармацыю, усё можна знайсці ў інтэрнэце”: “Але пытанне не ў тэхнічнай магчымасці доступу, а ў грамадскім статусе і легітымацыі”.

“Дазволіць іх легальны продаж — значыць публічна заявіць, што дзяржава абыякавая да распаўсюджвання гэтага бруду і нават гатовая на ім зарабляць падаткамі. Гэтага дапусціць нельга. Беларусь славіцца сваёй чысцінёй. Ва ўсім”, — сказаў на заканчэнне Маркаў.

Спіс друкаваных выданняў, забароненых да распаўсюджвання на тэрыторыі краіны, упершыню быў апублікаваны ў лістападзе 2024 года. Яго фармаванне стала магчымым пасля ўступлення ў кастрычніку 2023 года змен у закон аб выдавецкай справе.

Апошняе яго абнаўленне было ў пачатку жніўня гэтага года. На дадзены момант у спісе 141 кніга, у тым ліку мастацкая літаратура, сусветныя бэстсэлеры.

Беларускі ПЭН, які дзейнічае за мяжой, назваў спіс забароненых кніг “новай формай цэнзуры”.

У інтэрв’ю тэлеканалу СТБ 7 верасня намеснік міністра інфармацыі Дзяніс Язерскі заявіў, што ў Беларусі распаўсюджваецца шмат “літаратурнай дзындры”.

“Трэба забараняць. Не дазваляць прадаваць, не дазваляць увозіць тое, што сёння можа нанесці шкоду нацыянальным інтарэсам. І мы гэта робім”, — сказаў чыноўнік.

Гаворачы аб спісе забароненых выданняў, намеснік міністра дадаў: “Магчыма, мы не так актыўна яго прымяняем, як хацелася б”.