Гродзенскія пагранічнікі выявілі два беспілотнікі, шукаюць “удзельнікаў незаконнай дзейнасці”

6 верасня, Позірк. Гродзенскія пагранічнікі, абапіраючыся на аператыўную інфармацыю, выявілі 4 верасня ў прыграніччы беспілотнікі і прадметы, прызначаныя для “супрацьпраўнай дзейнасці”, паведаміла 6 верасня прэс-служба Дзяржаўнага пагранічнага камітэта.

Дакладная лакацыя не пазначаная, аднак паколькі да “мерапрыемстваў па спыненні парушэння заканадаўства” прыцягнулі ў тым ліку супрацоўнікаў АУС Гродзенскага райвыканкама, можна меркаваць, што гаворка пра Гродзенскі раён, які мяжуе з Польшчай і Літвой.

“Пры аглядзе мясцовасці выяўленыя два БЛА, пускавая ўстаноўка, матацыкл, а таксама аўтамабіль, — гаворыцца ў паведамленні. — У транспартным сродку знойдзеныя тэлефон, ноўтбук, 10 акумулятарных батарэй самаробнай вытворчасці і два пульты кіравання беспілотнікам”.

Ведамства не ўдакладняе, ці быў затрыманы хто-небудзь звязаны са знаходкай, але паведамляе, што высвятляюцца “іншыя ўдзельнікі незаконнай дзейнасці”. “Прызначаная экспертыза, па выніках якой будзе дадзеная прававая ацэнка”, — адзначыў Дзяржпагранкамітэт.

Заяўляецца, што гэта чацвёрты за тыдзень выпадак выяўлення беспілотнікаў у прыграніччы.

У апошні час дроны і аэрастаты актыўна выкарыстоўваюць кантрабандысты для дастаўкі ў ЕС нелегальных грузаў, як правіла, цыгарэт.