13 жніўня, Позірк. Латвійскія ўлады ў мэтах бяспекі могуць устанавіць абмежаванні на перасячэнне мяжы Латвіі з Беларуссю і Расіяй, піша Delfi.
Гаворачы аб неабходнасці распрацоўкі ўрадавага распараджэння, міністр зносін Аціс Швінка адзначыў, што яго ведамства сумесна з Аўтатранспартнай дырэкцыяй і Міністэрствам унутраных спраў сабралі даныя, якія паказваюць рост колькасці пасажыраў у аўтобусных перавозках у Беларусь і РФ.
“Такая сітуацыя ўзмацняе рызыкі бяспекі на знешняй граніцы дзяржавы, таму падрыхтавана нарматыўнае рэгуляванне, якое прадугледжвае абмежаванні ў пасажырскіх перавозках у Беларусь і Расію”, — растлумачыў чыноўнік.
Прапануецца распараджэннем Кабінета міністраў устанавіць абавязак для Дзяржаўнай пагранічнай аховы з 15 кастрычніка 2025 года “не дапускаць, каб пасажырскія перавозчыкі ажыццяўлялі міжнародныя нерэгулярныя пасажырскія перавозкі аўтобусамі праз граніцу Латвіі з Беларуссю і Расіяй у пунктах пропуску Патэрніекі, Грэбнева і Церахава”.
Акрамя таго, адначасова будуць захаваны “мінімальныя і рэгуляваныя магчымасці перамяшчэння пасажыраў з выкарыстаннем рэгулярных аўтобусных перавозак, арганізаваных у адпаведнасці з умовамі двухбаковых міжурадавых пагадненняў і нацыянальнымі нарматыўнымі актамі Латвіі”.
Інфармацыя з’явілася на фоне значнага скарачэння рэйсаў на маршруце Мінск — Вільнюс — Мінск.
З 15 красавіка 2022 года, калі Мінскам быў уведзены бязвізавы рэжым для жыхароў Латвіі, Беларусь наведала 376.187 грамадзян і неграмадзян гэтай балтыйскай дзяржавы.
Аўтарызавацца
Забыліся пароль?
Выхад з профілю
