У Батумі затрымалі дваіх беларусаў, ім ставяць у віну дзеянні з асабліва буйной партыяй наркотыкаў

8 ліпеня, Позірк. У Батумі затрымалі дваіх грамадзян Беларусі — Р. С. (2000 год нараджэння) і М. В. (2004 г.н.) — “па фактах незаконнага набыцця і захоўвання наркатычных сродкаў у асабліва буйным памеры, а таксама садзейнічання ў здзяйсненні нарказлачынства”, паведамляе прэс-служба паліцыі Грузіі са спасылкай на намесніка міністра ўнутраных спраў Аляксандра Дарахвялідзэ.

Чыноўнік заявіў, што ў жылым памяшканні, якое арандуе адзін з абвінавачаных, паліцыя падчас вобшуку выявіла “да 3 кг какаіну, каля 13 тыс. таблетак экстазі і гераін у асабліва буйным памеры”.

“Акрамя таго, пры асабістым надглядзе было канфіскавана 7 скруткаў, якія ўтрымліваюць какаін, экстазі, а таксама іншыя прадметы, прызначаныя для расфасоўкі наркотыкаў. Таксама на мабільным тэлефоне аднаго з абвінавачаных былі знойдзеныя фатаграфіі канкрэтных лакацый, адабраных для збыту наркатычных рэчываў”, — гаворыцца ў паведамленні.

Паліцыя мяркуе, што наркотыкі планавалася прадаваць у “розных начных клубах Батумі, што магло б нанесці непапраўную шкоду здароўю і жыццю людзей, асабліва моладзі”.

Распачатая крымінальная справа паводле арт. 260 (незаконнае набыццё і захоўванне наркатычных сродкаў, псіхатропных рэчываў або іх аналагаў без мэты збыту) і арт. 18-260³ (падрыхтоўка да незаконнага збыту наркатычных сродкаў, псіхатропных рэчываў або іх аналагаў) КК Грузіі. Калі віна маладых людзей будзе даказаная, іх могуць пазбавіць волі на тэрмін да 20 гадоў ці прызначыць ім пажыццёвае зняволенне.