Рэгулярныя кансультацыі па тэме нармалізацыі адносін Беларусі і ЗША вядуцца ўжо чатыры гады — Рыбакоў
Валянцін Рыбакоў
22 чэрвеня, Позірк. Рэгулярныя кансультацыі па тэме нармалізацыі беларуска-амерыканскіх адносін праводзяцца ў Вашынгтоне “з Дзярждэпартаментам ЗША, а з некаторых часоў — з кіраўніцтвам адміністрацыі (прэзідэнта) рэгулярна на працягу вось ужо чатырох гадоў“. Такую заяву зрабіў у інтэрв’ю беларускім дзяржаўным каналам пастаянны прадстаўнік Беларусі пры ААН Валянцін Рыбакоў.
Паводле яго слоў, у першую чаргу на такіх кансультацыях абмяркоўваюцца пытанні “канчатковай нармалізацыі двухбаковых адносін, поўнай нармалізацыі з аднаўленнем у поўным аб’ёме работы амбасадаў у абедзвюх краінах, абмен візітамі“.
“Акрамя таго, адным з прыярытэтных пытанняў з’яўляецца санкцыйная тэматыка. Пастаянна мы гэта падкрэсліваем”, — сказаў Рыбакоў.
“Санкцыі, якія з’яўляюцца абсалютна незаконнымі, — гэта санкцыі аднабаковыя, прынятыя ў парушэнне ўсіх нормаў міжнароднага права. Гэтае пытанне абмяркоўваецца, і мы спрабуем знайсці нейкія развязкі і рашэнні“, — адзначыў пастпрад.
21 чэрвеня спецыяльны прадстаўнік ЗША ў пытаннях Украіны Кіт Келаг сустрэўся ў Мінску з Аляксандрам Лукашэнкам.
У той жа дзень стала вядома пра вызваленне мужа беларускага дэмлідара Святланы Ціханоўскай відэаблогера Сяргея Ціханоўскага, актывіста анархісцкага руху Акіхіра Гаеўскага-Ханады, экс-супрацоўнік “Радыё Свабода“ Ігара Карнея, выкладчыцы Наталлі Дулінай, бізнесмена Сяргея Шэлега, удзельніка закрытага чата “Саюз беларускага нацыянальнага шчыта“ Кірыла Балахонава, а таксама грамадзян Эстоніі, Латвіі, Польшчы, палітвязня з беларускім і шведскім грамадзянствам Галіны Краснянскай.
Усе яны былі вывезеныя з краіны, беларускія грамадзяне знаходзяцца ў Вільнюсе.
30 красавіка стала вядома пра вызваленне палітвязня, беларуска-амерыканскага адваката Юрыя Зянковіча. На прэс-канферэнцыі ён адзначыў, што вызваленне стала магчымым дзякуючы амерыканскаму прэзідэнту Дональду Трампу, у ім удзельнічала мінімум 15 дыпламатаў.
Сёлета ў студзені і лютым у Беларусі былі таксама вызваленыя грамадзянка ЗША Анастасія Нуфер і неназваны амерыканскі грамадзянін.
12 чэрвеня стала вядома, што Трамп падоўжыў на чарговы год, пачынаючы з 16 чэрвеня, дзеянне нацыянальнага рэжыму надзвычайнай сітуацыі (НС) у дачыненні да Беларусі.
У адпаведным паведамленні адзначаецца, што “дзеянні і палітыка некаторых членаў урада Беларусі і іншых асоб, а таксама згубная дзейнасць і шматгадовыя злоўжыванні беларускага рэжыму працягваюць прадстаўляць незвычайную і надзвычайную пагрозу для нацыянальнай бяспекі і знешняй палітыкі Злучаных Штатаў”.
Прэзідэнт Джордж Буш-малодшы ўвёў рэжым НС у дачыненні да Беларусі пасля асуджэння экс-кандыдата ў прэзідэнты на выбарах 2006 года Аляксандра Казуліна (быў прыгавораны да 5,5 года зняволення, але выйшаў на волю ў жніўні 2008-га). Такім чынам, адпаведны ўказ 13405 “Блакаванне ўласнасці пэўных асоб, якія падрываюць дэмакратычныя працэсы або інстытуты ў Беларусі“, штогод падаўжаецца амерыканскімі кіраўнікамі ўжо на працягу 18 гадоў, з 2007-га.
У 2006 годзе пад абмежаванні трапілі Аляксандр Лукашэнка, намеснік кіраўніка яго адміністрацыі Наталля Пяткевіч, міністр юстыцыі Віктар Галаванаў, кіраўнік Белтэлерадыёкампаніі Аляксандр Зімоўскі, старшыня КДБ Сцяпан Сухарэнка, дзяржсакратар Савета бяспекі Віктар Шэйман, камандзір САХР Дзмітрый Паўлічэнка, міністр унутраных спраў Уладзімір Навумаў, старшыня Цэнтрвыбаркама Лідзія Ярмошына і дарадца Лукашэнкі па нацыянальнай бяспецы, яго старэйшы сын Віктар Лукашэнка.
Згаданыя асобы ужо не займае названыя пасады (Пяткевіч цяпер намеснік прэм’ер-міністра), некаторыя з іх не жывуць у Беларусі.
Як і ў аналагічным дакуменце год таму, у актуальным адзначалася што 9 жніўня 2021 года пашырыў санкцыі праз дзеянні беларускага рэжыму, накіраваныя на “падаўленне дэмакратыі і ажыццяўленне правоў чалавека і асноўных свабод у Беларусі”, у тым ліку “незаконных рэпрэсій, звязаных з фальсіфікацыяй прэзідэнцкіх выбараў у Беларусі 9 жніўня 2020 года і іх наступствамі”, а таксама за “ліквідацыю палітычнай апазіцыі і арганізацый грамадзянскай супольнасці” і “стварэнне пагрозы міжнародным грамадзянскім авіяперавозкам”.
У снежні 2024 года ў амерыканскім Дзярждэпе адзначалі, што “з моманту сфальсіфікаваных выбараў 2020 года ЗША абвясцілі 12 раўндаў санкцый супраць сотняў беларускіх асоб і арганізацый у рамках шырокіх намаганняў па прыцягненні да адказнасці за парушэнні, учыненыя рэжымам Лукашэнкі ў Беларусі і за мяжой“.
Амбасада ЗША ў Мінску прыпыніла працу 28 лютага 2022 года, цяпер яго супрацоўнікі працуюць у Вільнюсе.
20 ліпеня 2020 года амбасадарам Беларусі ў ЗША быў прызначаны намеснік міністра замежных спраў Алег Краўчанка, стаўшы першым на такой пасадзе за 12 гадоў. Аднак у сувязі з наступнымі падзеямі пасля сфальсіфікаваных прэзідэнцкіх выбараў у жніўні 2020 года дыпламат да Вашынгтона не даехаў. Ён раптоўна памёр 25 снежня 2020 года.
Гл. таксама па тэме:
