Лукашэнка на ініцыяваным Індыяй саміце паскардзіўся на санкцыі супраць калія

17 жніўня, Позірк. Абмежаванні адносна экспарту беларускіх мінеральных угнаенняў “абвастрылі праблемы недахопу харчавання і голаду ў самых бедных краінах”, заявіў Аляксандр Лукашэнка на ініцыіраваным Індыяй трэцім “Форуме Глабальнага Поўдня”.

Мерапрыемства праходзіць анлайн 17 жніўня.

“Захад па-ранейшаму правакуе канфлікты, якія спараджаюць шматмільённыя патокі бежанцаў, а потым цынічна абвінавачвае Глабальны Поўдзень і нас у міграцыйным крызісе”, — сказаў таксама Лукашэнка, якога цытуе яго прэс-служба.

Лукашэнка абвінаваціў Захад у “выпампоўванні рэсурсаў і навязванні краінам, якія развіваюцца, сістэмы неэквівалентнага абмену”.

“Больш за паўстагоддзя таму абвалілася сусветная сістэма каланіялізму, але гэта не прывяло да рэальнага вызвалення краін так званага трэцяга свету. Каланіяльных краін. Дэ-факта шмат у чым захоўваецца эканамічная і тэхналагічная залежнасць ад былых метраполій”, — сказаў ён.

Ён прапанаваў пастаўляць краінам-удзельніцам харчаванне, прамысловую прадукцыю, тэхналогіі, “у тым ліку лічбавыя”, “перадавыя практыкі ў ахове здароўя, уключаючы тэлемедыцыну, паслугі па падрыхтоўцы кадраў”.

“У нас ужо ёсць досвед эфектыўнага садзейнічання прагрэсу шэрагу краін Глабальнага Поўдня, іх індустрыялізацыі, павышэнню якасці і ўзроўню жыцця насельніцтва”, — сцвярджае аратар.

У прыклад ён прывёў Зімбабвэ.

Асноўныя імпарцёры беларускага калію — Бразілія, Кітай і Індыя.

Генеральны сакратар Арганізацыі Аб’яднаных Нацый Антоніу Гутэрыш на пасяджэнні Савета бяспекі ААН 5 мая 2023 года заявіў аб неабходнасці зняцця санкцый з экспарту беларускіх і расійскіх угнаенняў. Паводле яго слоў, на сустрэчах з расійскім і ўкраінскім лідэрамі ён узнімаў пытанне харчовага крызісу, які з прычыны вайны ва Украіне ўзнік у Сенегале, Нігеры і Нігерыі.

Дэмсілы Беларусі выступаюць супраць такога рашэння.

Абмежаванні на экспарт і транспарціроўку беларускага хлоркалію ўведзены ў 2022 годзе.

Прадстаўнікі Мінска рэгулярна спекулююць на тэме голаду ў сувязі з санкцыямі.