Аддзел навін 17 кастрычніка 2024, 13:10

Занадта стары, каб праграмаваць. Айцішнікаў дыскрымінуюць па ўзросце?

Wyborcza вывучыла публікацыі на тэму ўзросту айцішнікаў і задалася пытаннем: а ці заўсёды вопыт і стаж цэняцца ў гэтай галіне?

Канал Dzik Pic азнаёміўся з высновамі.

4 каментарыя

Wyborcza вывучыла публікацыі на тэму ўзросту айцішнікаў і задалася пытаннем: а ці заўсёды вопыт і стаж цэняцца ў гэтай галіне?

Канал Dzik Pic азнаёміўся з высновамі.

Каго можна лічыць сеньёрам?

— Айцішнік-сеньёр — гэта чалавек, які правёў шмат гадоў у галіне, працаваў над рознымі праектамі, часта з вельмі складанымі тэхнічнымі праблемамі, і сутыкаўся з многімі выклікамі. Гэта хтосьці, хто разумее не толькі тэхнічныя аспекты праграмавання, але і патрэбы бізнэсу, — кажа Артур Вайцяхоўскі, кансалтынг-менеджар з NTT DATA Business Solutions.

Гаворка ідзе пра вечную праблему паміж неразуменнем таго, што трэба кліентам, і рашэннямі, якія ствараюць айцішнікі. У такім выпадку прафесійна дасведчаны сеньёр у кампаніі на вагу золата.

Але з нейкай прычыны для кампаніі становіцца праблемай, калі яе сеньёр пачынае набываць не толькі вопыт, але і маршчыны.

Узроставая дыскрымінацыя айцішнікаў у заходніх кампаніях?

На думку ўладальніка HubSpot і выкладчыка ў MIT Браяна Халігана, «сівізна і вопыт пераацэненыя», і ён аддае перавагу найманню маладых.

Праблема ўзроставай дыскрымінацыі праграмістаў вядомая на Захадзе ўжо шмат гадоў і рэгулярна абмяркоўваецца ў СМІ.

Як пісаў часопіс Wired, у часе чарговай хвалі звальненняў многія ІТ-спецыялісты пачалі адчуваць, што вопыт больш шкодзіць, чым дапамагае ў іх прафесіі.

Кіраўніца кампаніі 55Redefineed Group Ліндсі Сімпсан, якая займаецца прасоўваннем сеньёраў на рынку працы, сцвярджае, што праца ў сферы ІТ — доля адносна маладых. Усяго 22% людзей у галіны старэйшыя за 50 гадоў, а ў аддзелах, якія займаюцца распрацоўкай софту, анлайн-рашэннямі або геймінгам, працэнт людзей старэйшых за 55 гадоў падае да 4%.

Прыведзеныя ёю даныя паказваюць, што калі вас не павысяць да 36 гадоў, то вашыя шанцы на павышэнне з кожным наступным годам будуць змяншацца на 5%.

А што наконт польскага ІТ?

Паводле леташняга даследавання Stack Overflow, больш за 75% праграмістаў у свеце маладзейшыя за 34 гады, а 93% — да 45 гадоў.

Сярэдні ўзрост польскіх прадстаўнікоў у гэтым даследаванні склаў без малога 25 гадоў.

Чаму няма старэйшых праграмістаў? На думку спецыялістаў Stack Overflow, гэта звязана з нявер’ем у сябе і свае здольнасці, павольнейшым тэмпам навучання, непаспяваннем за новымі тэхналогіямі і складанейшай адаптацыяй да новых умоў працы.

Атрымліваецца, што ІТ-галіна стварыла сама сабе пастку маладосці. Але так быць не павінна. Таму што сеньёры прыўносяць у кампанію цалкам новыя, унікальныя кампетэнцыі.

Гэта якія?

— Быць сеньёрам у такім асяроддзі азначае не толькі глыбокія тэхналагічныя веды, але і стратэгічнае і бізнэс-мысленне. Трэба ўмець не толькі вырашаць бягучыя праблемы, але і прадбачваць тыя, якія могуць з’явіцца праз год-два — а гэта патрабуе шырокіх кампетэнцый, якія набываюцца гадамі, — расказвае Wyborcza Лукаш Панчыкоўскі, Software Engineer міжнароднай ІТ-кампаніі Forterro. — Сеньёр-праграміст можа мець 30 гадоў і валодаць найноўшымі тэхналогіямі, або 50 гадоў з неацэнным досведам працы.

Ключавым з’яўляецца адное: здольнасць прымаць рашэнні, якія аказваюць доўгатэрміновае ўплыў на праект, а не проста пісаць код.