Распрацоўшчык амаль год не атрымлівае зп. Ягоны цёзка — пад санкцыямі ЗША

Ці памятаеце, пазамінулага тыдня CEO ITechArt Сяргей Каваленка ў карпаратыўнай рассылцы расказаў супрацоўнікам пра прычыны крызісу і абвясціў антыкрызісныя меры?

Фраза СЕО пра тое, што кампанія шануе цяжкую працу супрацоўнікаў і імкнецца забяспечыць ім спрыяльнае асяроддзе, зачапіла аднаго з украінскіх распрацоўшчыкаў. Ён адправіў у рассылку вялікі ліст, у якім расказаў, што ITechArt завінавацілася (не можа перавесці) яму зп прыкладна за 10 месяцаў. Адразу некалькі супрацоўнікаў кампаніі пераслалі ліст dev.by.

«Паверце, за гэты час я ініцыяваў мноства званкоў/электронных лістоў, каб вырашыць праблему мірным шляхам без прыцягнення лішняй увагі», — піша распрацоўшчык. Але пытанне не вырашылася.

У лісце-рассылцы ў адказ кіраўніцтва ITechArt падрабязна тлумачыць, чаму так выйшла. Ключавая падрабязнасць: распрацоўшчык — цёзка чалавека, які патрапіў пад амерыканскія санкцыі. І з пачаткам вайны банкі сталі блакаваць пераказы на ягоны адрас. Кампанія прапаноўвала супрацоўніку альтэрнатыўныя варыянты, але той іх адхіляў. Залічыць грошы наўпрост на рахунак распрацоўшчыка так і не ўдалося. Пры гэтым кампанія не здымае з сябе забавязанняў і абяцае разлічыцца цалкам.

Распрацоўшчык падрыхтаваў адказ з пярэчаннямі, але адправіць яго ў карпаратыўнай рассылцы ўжо не змог: ягоная пошта на той час была заблакаваная.

dev.by азнаёміўся з перапіскай і распытаў распрацоўшчыка пра дэталі гісторыі. 

Што здарылася

Версія распрацоўніка

Так, распрацоўшчык — цёзка (супадаюць імя і прозвішча) аднаго з фігурантаў «спісу Магніцкага». Пад санкцыямі гэты фігурант яшчэ ад 2013 года, але да пачатку вайны наш герой не здагадваўся пра існаванне «праблемнага» цёзкі і ніякіх складанасцей з гэтай нагоды не адчуваў.

— Нармальна жыў, працаваў у Польшчы, Даніі, Ганконгу, карыстаўся ўсімі сэрвісамі — PayPal, Amazon і г. д., — кажа ён. — Ад лістапада 2021-га года я ў iTechArt, быў кантракт з філіялам ва Украіне. Сума зафіксаваная ў доларах, а выплаты ў грыўнях. І ўсё было добра. Але з пачаткам вайны рахункі кампаніі заблакавалі, і мяне перавялі на прамы кантракт з офісам у ЗША. Выплаты адпаведна ў доларах — на рахунак ФОП (Фізична особа — підприємець, аналаг ІП. — dev.by). Ад гэтага моманту і пачаліся праблемы.

Першы плацеж па новым кантракце (за сакавік) мусіў паступіць у красавіку. Гэтага не здарылася, фінаддзел паведаміў пра праблему. Менеджары мне сказалі, што займаюцца, але ніякага агульнага чата створана не было. У чэрвені фінаддзел паведаміў мне, што, магчыма, рэч у санкцыях. Без дэталяў.

Паводле слоў распрацоўшчыка, пасля гэтага ён сам знайшоў «сябе» ў «спісе Магніцкага» і паведаміў пра гэта кампаніі. 

У чэрвені і ліпені распрацоўшчыку ўдалося атрымаць два SWIFT-плацяжы ад кампаніі — за сакавік і красавік. Гэта яго абнадзеіла, але потым праблемы аднавіліся. 

— Жнівень, верасень — нічога. Падняў пытанне зноў. Дамовіліся, што зробім адзін пераказ праз іншага супрацоўніка-ФОП, а потым са мной пераўкладуць дамову праз філіял у Еўропе — Славакіі альбо Польшчы. Грошы пералічылі, але дамовы так і не перападпісалі.

Што кажа пра праблему з пераказамі кампанія (пераказ ліста кіраўніцтва iTechArt)

Праз тое, што чалавек з тым жа імем быў у санкцыйным спісе, заробкавыя пераказы iTechArt на працягу некалькіх месяцаў падвяргаліся санкцыям у амерыканскім банку. У выніку яны блакаваліся Упраўленнем кантролю за замежнымі актывамі (Office of Foreign Assets Control, OFAC). 

Першы «адмоўны» плацеж быў у красавіку 2022 года, за ім былі іншыя беспаспяховыя спробы пераказаць грошы і пацвердзіць асобу нашага супрацоўніка ў банках і дзяржустановах.

Менеджары рэгулярна дзяліліся з супрацоўнікам новай інфармацыяй. Яму прапанавалі альтэрнатыўныя рашэнні, уключаючы:

— Гатоўка. Дадатковыя сродкі адпраўляюць украінскаму калегу, а той перадае грошы;

— Мясцовы банкаўскі пераказ. Дадатковыя сродкі адпраўляюць украінскаму калегу, а той робіць банкаўскі пераказ унутры Украіны.

— Праз аднаго супрацоўніка. Грошы сыходзяць сябру нашага супрацоўніка ў ЗША, а той адпраўляе іх нашаму супрацоўніку (паводле яго слоў, ад сябра грошы даходзілі без праблем).

Паколькі наш супрацоўнік хацеў атрымліваць зарплату ў доларах ЗША, а не ў мясцовай валюце праз абменны курс, ён адхіліў гэтыя альтэрнатыўныя рашэнні.

Калі мы прапанавалі адправіць плацеж яго сябру з ЗША, які мог бы паўторна адправіць яму плацеж у доларах ЗША, ён адмовіўся даць кантактную інфармацыю свайго сябра. 

У рэшце рэшт кампанія знайшла яшчэ адное рашэнне — пераказ праз амерыканскую платформу воблачных плацяжоў bill.com. Але яно не спрацавала. Транзакцыя ў доларах была адхіленая, а пры тэставай транзакцыі ў еўра грошы знялі з рахунку кампаніі, але не даставілі супрацоўніку.

Чаму наогул так выйшла, і ці ёсць процітрута

У iTechArt падкрэсліваюць, што праблема не на ўзроўні банкаў, што гэта «сістэмная памылка Упраўлення па кантролі за замежнымі актывамі (OFAC)». Маўляў, нават калі іншая арганізацыя паспрабуе адправіць супрацоўніку яго плацяжы, OFAC працягне блакаваць плацяжы праз чалавека ў санкцыйным спісе з такім жа імем.

Распрацоўшчык сумняваецца ў гэтым. Ён звяртае ўвагу, што два банкаўскія плацяжы былі залічаны. У квітанцыі пра гэтыя транзакцыі пазначана, што праверка OFAC заняла адзін дзень і прайшла паспяхова. Падрабязнай квітанцыі пра няўдалую транзакцыю ён не бачыў.

Айцішнік напісаў у OFAC і атрымаў у адказ, што сам офіс нічога не блакуе — блакуюць банкі, таму запыты трэба адпраўляць туды.

— Але гэта можа зрабіць толькі адпраўнік пераказаў, — кажа распрацоўшчык. — Кампанія мусіла запытаць статус у банка. Я не бачыў, ці быў такі запыт. Таксама ў OFAC мне адказалі, што адпраўнік можа запоўніць спецыяльную анкету, пазначыўшы ў ёй даныя атрымальніка. Тады OFAC выдасць дазвол банку, і плацеж гарантавана пройдзе. Я склаў інструкцыю для кампаніі, як гэта зрабіць, яшчэ ўлетку ці ўвосень.

Чаму кампанія лічыць, што ейнай віны няма (пераказ ліста кіраўніцтва iTechArt)

Кампанія неаднаразова рабіла спробы пералічыць грошы наўпрост, падавала дакументы ў банкі і дзяржустановы, спрабуючы давесці, што іх супрацоўнік не знаходзіцца пад санкцыямі, але карані ўзніклай праблемы па-за кантролем кампаніі.

Чаму распрацоўшчык не згодны

На яго думку, кампанія занадта зацягнула пошук рашэння. 

— Калі сітуацыя выявілася, я сказаў, што варыянт з пасярэднікамі мяне не задавальняе, хіба што як разавы. Калі рашэння няма, трэба завяршыць супрацоўніцтва. Але мне штораз казалі, што рашэнне будзе знойдзенае, напрыклад, праз падпісанне дамовы з філіялам у Еўропе. Аднак гэтага чамусьці так і не зрабілі. 

Я разумею, што сам свядома пагадзіўся на адтэрміноўку выплат. Адзіны папрок кампаніі ў тым, што кожнага разу яна давала надзею замест таго каб сказаць: мы не можам вырашыць гэтую праблему нармальна. 

Якая сітуацыя цяпер

Распрацоўшчык звольнены. Фактычна ён спыніў працу 1 лютага, страціўшы надзею дачакацца развязання праблемы, але працэс звальнення, паводле ягоных слоў, кампанія ініцыявала толькі ў другой палове сакавіка. Пры фінальным разліку паўсталі спрэчкі аб тым, якой датай праводзіць звальненне і адпаведна за колькі месяцаў назбіраўся доўг. Айцішнік настойвае, што дата фактычнага разліку і звальнення мусяць супадаць. Калі не, то хай за апошнія два месяцы чакання яму выплацяць няўстойку, паводле дамовы. 

Кіраўніцтва кампаніі ў карпаратыўным лісце паабяцала выплаціць распрацоўшчыку «поўную кампенсацыю». Што праўда, якім чынам гэта будзе зроблена, да канца незразумела.

Браць гатоўку распрацоўшчык адмаўляецца.

— Па-першае, мая форма рэгістрацыі ФОП у падатковай Украіны не дазваляе гэтага зрабіць. А па-другое, я хачу законны спосаб атрымання аплаты паводле кантракта. І валюта з абменным курсам тут ні пры чым. Я гатовы прыняць да разліку і грыўню, і долар.

Мы раскажам, чым скончылася гэтая гісторыя. Калі iTechArt захоча дадаткова пракаментаваць сітуацыю, мы апублікуем каментар.

Вы дачыталі гэты матэрыял да канца. Калі вы тут апынуліся, значыць, хутчэй за ўсё, вас штосьці зачапіла. Выдаткуйце яшчэ 30 секунд, калі ласка.  

Беларускае ІТ нельга ўявіць без dev.by.

Мы ўжо амаль 15 гадоў робім важныя і сумленныя матэрыялы, дапамагаем кожнаму з вас дзяліцца прафесійным досведам і думкамі, робім беларускую версію. Мы радаваліся поспехам індустрыі разам, звярталі ўвагу на несправядлівасць, даем слова кожнаму.

Сёння рэдакцыя dev.by — каманда аддаленых беларусаў з 10 чалавек. Яшчэ ў нас ёсць менеджмент, бэкофіс і, вядома, тэхнічныя спецыялісты. У нас 600+ тысяч чытачоў штомесяц і дзясяткі тысяч у тэлеграм-каналах і сацыяльных сетках. Мы выпускаем 300+ навін і вялікіх тэкстаў, накшталт таго, што вы толькі што чыталі. Усе беларускія медыя цытуюць dev.by.

Ва ўсіх цёмныя часы. І мы ідзем праз ідэальны шторм разам з кам’юніці. Нашыя рэкламныя даходы, якія былі крыніцай фінансавання рэдакцыі, скараціліся ў некалькі разоў.

Пры гэтым мы ўпэўненыя, што тым больш важна працягваць заставацца месцам сустрэчы беларускай ІТ-супольнасці — усіх, хто застаецца і з’язджае.

Вы можаце нам дапамагчы. Пры канцы мінулага года мы запусцілі падпісную кампанію — пачалі збіраць данаты ад чытачоў. Мы хочам у 2023 сабраць 1000 чытачоў-падпісчыкаў. Цяпер іх 170.

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Цяпер сярэдні чэк — каля 10$, але мы радыя любой суме. Штомесячныя плацяжы робяць нашыя планы больш прадказальнымі, але вы самі глядзіце, як вам зручна :)

Дзякуй, што прачыталі гэтае паведамленне.

«Звольнілі за дзень». Як айцішнікі застаюцца без працы ў 2023

Па тэме

«Звольнілі за дзень». Як айцішнікі застаюцца без працы ў 2023