А калі заўтра скароцяць? Айцішнікі падзяліліся планамі на чорны дзень
Публікуем тры кейсы.
«Укладу $20-30 тысяч у турызм»
— Некалькі гадоў жыву па Уроцлаве, працую ў буйной аўтсорсінгавай кампаніі на пазіцыі Senior manual QA.
У мяне assignment на праекце хутка сканчаецца. А з праектамі ў кампаніі не вельмі. На тыя, што ёсць, даводзіцца прагрызацца. Пры гэтым доўга на бэнчы не трымаюць — 2 месяцы, потым у адпачынак і далей «на мароз». То-бок у выпадку адсутнасці праекта больш за тры месяцы я не пратрымаюся.
А на рынку для мануальшчыка перспектывы такія сабе. Таму ўжо на працягу паўгода рассылаю рэзюмэ. Ужо разаслаў каля 290 рэзюмэ, атрымаў 50 адмоў, правёў 14 інтэрв’ю, атрымаў 2 оферы, але абодва адхіліў.
У адным выпадку па таймінгу не атрымлівалася ў Познань ездзіць з Уроцлава (там было тэсціраванне на дэвайсах заказчыка). У другім выпадку ўжо на этапе прыняцця оферу высветлілася, што трэба ехаць у іншую краіну. Але мы нікуды не збіраемся, пакуль мая жонка не атрымае польскага пашпарта.
Думаю, прыдатныя вакансіі можна яшчэ паўгода шукаць. Рынак перагрэты, канкурэнцыя вялікая, а вакансій вельмі мала.
Калі раптам мяне скароцяць, то адзін з варыянтаў, што рабіць далей — сысці ў сферу турызму. Буду займацца арганізацыяй тураў па Еўропе для дыяспары.
Патрэбны стартавы капітал. Спадзяюся, што не большы за 20-30 тысяч долараў для сціплага старту. Гэта ж не рэстаран адкрываць. Большая частка пойдзе на першапачатковую рэкламу і раскрутку, калі казаць аб арганізацыі аўтобусных тураў па ўсёй Еўропе.
А проста экскурсіі вадзіць па горадзе можна і без гроша ў кішэні. Паплакацца мясцовым паблікам і папрасіць першапачаткова размяшчаць рэкламу бясплатна, і потым ужо за яе плаціць.
Ужо магу вадзіць экскурсіі па Уроцлаве, што і раблю для тых, хто прыязджае ў госці. Гутарковая польская прыкладна на ўзроўні A2, спадзяюся, што набліжаецца да В1 (але мовы мэтанакіравана не вучу, стараюся больш размаўляць з палякамі, глядзець польскі ютуб, чытаць навінавыя рэсурсы). Аб’ездзіў Ніжнюю Сілезію і прылеглыя раёны Чэхіі і Германіі.
Але трэба ўлічваць, што гэта толькі папярэднія накіды і тое, чым сапраўды хацелася б займацца. Рэсёрчу я не праводзіў, акупнасці і меркаваных даходаў не лічыў. Проста мары.
Яшчэ мне прапаноўваюць стаць гідам у Ісландыі. Там жыве знаёмы, які арганізуе туры па краіне. У яго няма чалавека, які б разбіраўся ў гісторыі і культуры і мог бы паказаць і расказаць пра гэта на англійскай. А я трохі разбіраюся ў гісторыі скандынаўскіх краін. Што праўда, пераязджаць у Ісландыю я не збіраюся. Так што гэты варыянт — на самы крайні выпадак.
Яшчэ адзін варыянт на крайні выпадак, калі ўжо зусім будзе дрэнна, — пайсці працаваць у гандлёвую сетку Biedronka. Або можна пайсці працаваць на склад садовай прадукцыі. Загрузка, разгрузка, упакоўка тавару. 10 гадзін на дзень, 27-28 злотых на гадзіну. За месяц можна атрымаць чыстымі 4000 злотых (больш за 1 тыс. долараў). Гэтага, што праўда, хопіць, толькі каб аплаціць камуналку і іпатэку. Толькі на выплату іпатэкі штомесяц трэба 3200 злотых (блізу 820 долараў).
«Даўно хацеў расчахліць ашчаджанні і пажыць без працы»
— Працую распрацоўшчыкам у ІТ-кампаніі ў Азіі. Каманду нашага праекта за апошнія паўгода зрэзалі дзесьці ў 3 разы. Бізнэс кліента цяпер перажывае не найлепшыя часы. Акрамя таго ён правёў аптымізацыю выдаткаў, цяпер не разумее, чаму ўсё так павольна. Кліент і раней праводзіў аптымізацыю, проста нас гэта не тычылася (скарачэнні былі на яго баку). А на пачатку года ён прыйшоў да нашых менеджараў і папрасіў прыбраць 50% каманды распрацоўкі.
Многія знаходзілі працу самастойна і сыходзілі ў іншыя кампаніі, камусьці ўдавалася перайсці на іншы праект і не звальняцца. Калі праект закрыецца (звальняць часткова тут няма сэнсу — людзей і так не хапае), то спадзяюся, што атрымаецца перайсці на іншы праект.
Калі ж не выйдзе, значыць гэта знак зрабіць тое, што даўно хацеў — расчахліць ашчаджанні і пажыць нейкі час без працы. Я нядаўна пераехаў у іншую краіну, якраз будзе час яе даследаваць лепей.
Ашчаджанняў хопіць прыкладна на год, але я думаю, што максімум, які дазволю сам сабе — 2-3 месяцы. А хутчэй за ўсё, ужо праз два тыдні буду шукаць новую працу.
Пакуль нічога не шукаў, але CV на днях актуалізаваў. У цэлым, па маім профілі вакансіі ёсць, пры гэтым лакацыя значэння не мае, галоўнае, каб працадаўца быў згодны працаваць па B2B. Пакуль з’язджаць адсюль не планую.
«Ад працы залежыць ДНЖ, таму манітору рынак вакансій»
— Жыву ў Фінляндыі, працую распрацоўшчыкам у мясцовай ІТ-кампаніі. Пераехаў сюды пасля пачатку вайны.
Заходні карпаратыўны свет так уладкаваны, што скарачэнні тут у парадку рэчаў. Асабліва гэта тычыцца буйных публічных кампаній. Прыклад Х і Ілана Маска знаюць многія.
У кампаніі ўжо была адная хваля скарачэнняў для паляпшэння паказчыкаў. А калі твой ДНЖ залежыць ад працы (на ДНЖ могуць прэтэндаваць толькі супрацоўнікі фінскіх кампаній), трэба быць заўсёды ў форме.
Таму манітору рынак вакансій па сацыяльных сувязях. Тут шмат рускамоўных айцішнікаў, ёсць мігранцкія супольнасці, чаты накшталт IT Finland. Гляджу сайты буйных кампаній, напрыклад, Nvidia, Microsoft, Nokia. У Фінляндыі дрэнна працуе пошук працы праз сайты тыпу Gglassdor. Шукаю прапановы для Senior Developer C++, Python з заробкам ад 80 тысяч еўра на год да падаткаў.
Цікаўлюся толькі мясцовымі вакансіямі. Пераязджаць з краіны, якая на першым месцы ў рэйтынгу шчасця, няма куды. Нас усё задавальняе. Працаваць аддалена не магу, паколькі ДНЖ мае на ўвазе фінскага працадаўцу.
Рэзюмэ пакуль не рассылаў, але калегі знаходзілі новую працу ўжо пасля пераезду. Вакансіі ёсць, але рынак працы маленькі, як і колькасць спецыялістаў. Атрымліваецца трохі замкнёная супольнасць, дзе ў кожнага свая гісторыя.
Читать на dev.by