Аддзел навін 21 лютага 2024, 15:20

Распрацоўшчыка Apalon разам з актывамі Mosaic Group прадалі за $160 млн

Амерыканская карпарацыя IAC прадасць інтэлектуальную ўласнасць Mosaic Group італьянскай ІТ-кампаніі Bending Spoons за 160 мільёнаў долараў. Пра гэта гаворыцца ў фінансавай справаздачнасці кампаніі за чацвёрты квартал 2023 года.

3 каментарыя

Амерыканская карпарацыя IAC прадасць інтэлектуальную ўласнасць Mosaic Group італьянскай ІТ-кампаніі Bending Spoons за 160 мільёнаў долараў. Пра гэта гаворыцца ў фінансавай справаздачнасці кампаніі за чацвёрты квартал 2023 года.

Пра ўгоду стала вядома яшчэ на пачатку студзеня гэтага года. Паводле інфармацыі крыніц Bloomberg, першапачаткова яе ацанілі ў 100 мільёнаў долараў. Закрыць угоду плануецца да канца першага квартала.

Mosaic Group месціцца ў Нью-Ёрку і з’яўляецца матчынай кампаніяй беларускага мабільнага распрацоўшчыка Apalon. У яе партфоліа таксама ўваходзяць сэрвіс для рэдагавання дакументаў PDF Hero і блакавальшчык спам-званкоў RoboKiller. Прадметам угоды з Bending Spoons стала інтэлектуальная ўласнасць Mosaic, пры гэтым каманда — не.

У сувязі з угодай Apalon на працягу лютага-сакавіка звольніць усю беларускую каманду (100+ чалавек). Супрацоўнікаў яшчэ ў студзені апавясцілі пра звальненне. Офіс у Мінску закрыюць.

Усяго пасля завяршэння ўгоды без працы застануцца каля 330 супрацоўнікаў Mosaic Group. Паводле інфармацыі Bloomberg, супрацоўнікі Mosaic, якія страцілі працу, атрымаюць выходную дапамогу мінімум за 4 месяцы і бонус за 2023 год. Адзін з супрацоўнікаў Apalon пацвердзіў, што ўсім звольненым «выплацяць некалькі заробкаў, а таксама пакінуць працоўныя ноўтбукі». Хто будзе займацца падтрымкай прадуктаў Apalon (калі будзе), невядома.

Сярод супрацоўнікаў Apalon ходзіць версія, што новыя прадукты спатрэбіліся пакупніку для выхаду на IPO. Эксперты ў галіне інвестыцый раней выказалі сваё меркаванне, нашто купляць прадукт, а каманду адпраўляць на мароз.

Напрыклад, Юрый Мельнічак лічыць, што інтэлектуальная ўласнасць Mosaic Group для новых уладальнікаў можа быць накшталт cash cow.

— Калі памеркаваць кошт угоды ў $100-200M (у навінах пішуць «> $100M»), то гэта дзесьці 1-3 гадавыя выручкі праграм Apalon. Фактычна купляюць праграмы, ацэньваючы іх па discounted cash flow.

Звальняючы каманду, робяць літаральна cash cow. Зразумела, што са звольненай камандай праграмы перастануць развівацца. Таму мой прагноз: яшчэ і манетызацыю ў саміх праграмах выкруцяць на максімум, каб зняць пабольш грошай c праграм, якія будуць паступова загінацца.

Мяркуючы па чутках пра будучы IPO Bending Spoons, гэта яшчэ і карысна, каб падняць карыстальніцкую базу, выручку і, адпаведна, кошт кампаніі на IPO.

Некалькі версій і ў Ігара Маханька.

Некалькі версій і ў Ігара Маханька.

— Тут можа быць шмат варыянтаў. Напрыклад, у пакупніка вялікая каманда ўжо ёсць, на цяперашніх прадуктах задач недастаткова, і такім чынам (з дапамогай куплі дадатковых прадуктаў без каманды) можна пазбегнуць лэй-офаў. Магчыма, прадукты Apalon настолькі mature, што не патрабуюць вялікай каманды для развіцця і падтрымкі.

Да таго ж мы не ведаем, наколькі прыбытковым быў Apalon: магчыма, пакупнік не бачыў сэнсу ў пагадненні, калі б атрымліваў не толькі прыбыткі ад праграм, але і выдаткі на заробкі.

Можа быць і такое, што пакупніку патрэбныя не столькі праграмы Apalon, колькі карыстальнікі, якіх яны змогуць перанакіраваць на іншыя свае праграмы.

Аpalon заснавалі ў 2007 годзе мінчукі Пётр Скаромны і Мацвей Цімашэнка. У кампаніі 50+ распрацаваных прадуктаў, агульная колькасць загрузак перавышае 600 мільёнаў.

Па выніках 2021 года кампанія Apalon увайшла ў топ-5 паблішараў з беларускімі каранямі па выручцы (паводле адкрытых даных Sensor Tower). Выручка распрацоўшчыка вырасла адносна 2020 года на 11% і перавысіла 100 мільёнаў долараў. Па загрузках сярод паблішараў з беларускімі каранямі кампанія ўваходзіць у топ-10.

Увесну 2022 года кампанія скараціла 15% каманды ў выніку рэструктурызацыі. Станам на май 2023 года ў Аpalon працавала каля 150 супрацоўнікаў.