Таксама доўга, але хутчэй. Як айцішнікі шукаюць працу за мяжой — рэсёрч

Мы працягваем разбіраць студзеньскую анкету пра тое, як айцішнікі шукалі працу ў 2023–2024 гадах. Гэтым разам аналізуем адказы тых, хто ў часе пошукаў знаходзіўся за мяжой.

Ці доўга? Як айцішнікі шукаюць працу ў Беларусі — вялікі рэсёрч

Па тэме

Ці доўга? Як айцішнікі шукаюць працу ў Беларусі — вялікі рэсёрч

Крыху менш за палову тых, хто запоўніў анкету (228), шукала працу ў ІТ, будучы па-за межамі Беларусі. Нескладана выказаць здагадку, што гэта хутчэй спецыялісты з досведам, і адказы гэта пацвярджаюць: 86% прылічылі сябе да мідлоў і вышэйшых, астатнія — джуны альбо інтэрны. Самая шматлікая ўзроставая катэгорыя — 26-35 гадоў, да яе належыць больш за 60% рэспандэнтаў.

Гэты расклад прыкметна адрозніваецца ад таго, што ў Беларусі: там тых, каго звольнілі і хто звольніўся, менш (37% і 22%), затое шмат «першашукальнікаў» (22%). За мяжой жа тых, хто шукае першую працу ў ІТ, амаль няма (ёсць толькі адзін дарослы «ўвайсцішнік», які праходзіць лабараторыю ў польскім Andersen).

Досвед не ратаваў супрацоўніка ад скарачэння: сярод звольненых з ініцыятывы кампаніі сеньёраў нават больш, чым мідлоў.

Адкуль шукалі працу

Дзве траціны (66%) суіскальнікаў-рэлакантаў шукалі працу, будучы ў Польшчы. Амаль 10% — у Грузіі, крыху больш за 8% — у Літве, па некалькі чалавек — на Кіпры, у Іспаніі, Турцыі, Казахстане, Вялікабрытаніі, Расіі, ЗША, і іншых краінах. У цэлым гэта адпавядае геаграфіі рассялення беларускіх айцішнікаў пасля вялікага зыходу. 

Колькі водгукаў і офераў

Адгукацца даводзілася шмат. Толькі чвэрць праявіла стрыманасць у водгуках, зрабіўшы не больш за 10. Умераных (10 + водгукаў) крыху менш за траціну. Кожнаму пятаму прыйшлося адгукацца на вакансіі 50+ разоў, такой жа колькасці суіскальнікаў — 100+ разоў. Восем чалавек сцвярджаюць, што зрабілі гэта 500+ раз. З іх толькі дваім удалося знайсці працу, астатнія сямёра яшчэ шукаюць.

Большасць рэспандэнтаў офераў не перабіралі: 30% атрымалі толькі адзін.

Кожны чацвёрты мог выбраць з 2-3 офераў (але не ўсіх яны задаволілі), і толькі 11 чалавек маглі пахваліцца вялікай колькасцю, у астатніх вынік — 0.

Колькі знайшлі і ў якія тэрміны

Поспехам пошукі ўвянчаліся ў 62% суіскальнікаў (пар.: у Беларусі ў 58%). Больш як траціна (36%) працы так і не знайшла.

Астатнія ні «так», ні «не»: кагосьці ўзялі часова, кагосьці на стажыроўку, хтосьці адмовіўся ад офера. Знайшоўся і чалавек у роспачы: яму здаецца, што ён unhireable.

Сярод тых, хто працу знайшоў, 19% (26 са 140) уклаліся ў тэрмін да месяца, у 35% (48 са 139) сышло на пошукі 1-2 месяцы, у 31% (43) — 3-4 месяцы, у 9% (13) — 5-6 месяцаў, 5% (7 з 139) выдаткавалі больш за паўгода.

Але цікава паглядзець і на тэрміны пошукаў усіх рэспандэнтаў, уключаючы тых, хто не знайшоў ці ўсё яшчэ шукае.

Да месяца, як у старыя добрыя часы, шукалі працу 13%. Тых, хто шукаў/шукае 1-2 месяцы і 3-4 — пароўну, па 30%. У 11% пошукі працягваліся (-юцца) 5-6, у 16% — больш за паўгода.

Дзе праца

Як ні дзіўна, не толькі на Захадзе. Так, тры чацвёртыя (76%) прынялі оферы з Еўропы, а кожны дзясяты — у ЗША/Канадзе. 10 чалавек (7%) адказалі, што знайшлі працу ў Беларусі, трое — што ў Расіі. Зрэшты, большасць працаўладкаваных у РБ усё роўна працуе на заходніх праектах, пара чалавек — на расійскіх.

Незалежна ад рэгіёна новага месца працы ў большасці рэспандэнтаў (71%) зп вырасла, у 15% не змянілася, у астатніх знізілася. А ў аднаго ліда ў Польшчы вось так: «Gross вырас, netto ўпала праз іншае падаткаабкладанне».

Што пішуць пра рынак

Тры чвэрці (74%) айцішнікаў за мяжой адзначылі, што знайсці працу ў 2023–2024 гадах стала істотна складаней. А менавіта:

• «На польскім рынку адной з асноўных праблем будзе мова і права на працу (ДНЖ, віза). Мне дапамог добры нэтворкінг у LinkedIn (13К+ кантактаў, запоўнены профіль і актыўная пазіцыя ў супольнасці). Ну, і мой фокус на пазіцыі ў кампаніях з беларускімі каранямі».
• «Залішне складаныя працэсы, выкарыстанне раздзьмутых фрэймворкаў і няўменне дэліверыць простыя патрэбныя рэчы ў разумныя тэрміны».
• «Польшча. Рынак выглядае горш, але знайсці новую працу рэальна, ёсць цікавыя вакансіі ў Еўропе. Заклад поспеху — веданне англійскай, софтскілы і якаснае рэзюмэ».
• «Велізарная канкурэнцыя па пазіцыі Junior UX/UI designer у Польшчы: калі ў мінулым годзе было 100 чалавек на месца, то ў гэтым 500 чалавек».
• «Усё сумна».
• «Я вярнуўся з Польшчы ў РБ і бачу, што тут працы значна больш, чым у Польшчы, але ў асноўным на буйных расійскіх гульцоў».
• «Заўважыла, што ў Літве як быццам наогул не адчуваецца крызіс у ІТ: усё спакойна сыходзяць з добрай працы ў нікуды, упэўненыя, што знойдуць лепшае месца. Яшчэ з незвычайнага: у польскай айцішцы абавязкова патрэбная польская. У выніку жыву ў Польшчы, але працую на літоўскую кампанію».
• «Склалася адчуванне, што суіскальнікаў значна больш, чым вакансій. У выніку часта адмаўлялі пасля скрынінгу проста таму, што ёсць больш прыдатныя кандыдаты».
• «У 2021-м атрымала некалькі офераў за тыдзень, усе з першага разу, цяпер сышло амаль 5 месяцаў».
• «Польшча. Для спецыяліста Middle і вышэйшых на рынку ўсё не так дрэнна: так, горш чым у дакавідныя часы, але не крытычна. Больш цісне фон ад звальненняў у вялікіх кампаніях».
• «Адмова ад танных грошай прымусіла кампаніі павялічыць прадукцыйнасць».
• «Не атрымаў офераў пры пошуку на рынку, у выніку знайшоў працу ў старых знаёмых без усялякіх сумоўяў».
• «Працу знайсці было складана як у 2021-м, калі ў мяне не было камерцыйнага досведу, так і цяпер, калі я стаў мідлом».
• «Вельмі мала вакансій на рынку для .Net распрацоўшчыка».
• «Мінулы раз шукала працу ў 2022-м. Пошукі занялі два месяцы, за гэты час падалася на 109 вакансій і атрымала 4 оферы Цяпер шукаю працу ад сярэдзіны лістапада, то-бок таксама ўжо два месяцы. За гэты час адгукнулася толькі на 29 вакансій, пры гэтым моцна я не перабіраю, падаюся на ўсе больш-менш рэлевантныя. Пакуль сумоўі былі толькі ў дзвюх. У адную з іх прайшла поўны цыкл сумоўяў, чакаю рашэння».
• «У Аўстрыі вельмі бедны ІТ-сектар. Для 85% вакансій патрабуецца нямецкая мова на размоўным узроўні. На астатніх 15% вельмі вялікая канкурэнцыя. Пры гэтым Аўстрыя для фрылансераў — вельмі дрэнны варыянт: легалізацыя амаль немагчымая і падаткі вельмі высокія (як і цэны)».
• «Працу знайсці можна, але значна складаней, чым да 2023 года. Цяпер не вы выбіраеце кампанію, а кампанія выбірае вас. Хоць многае ўсё яшчэ залежыць ад шанцавання».
• «Стан рынку — поўны трэш у параўнанні з 2021-м і іншымі вясёлымі часамі. Скарачэнні ёсць, вакансій няма, працы лепш не губляць».
• «Было больш за 60 прыцэльных водгукаў на мэтавыя вакансіі з адаптацыяй CV пад іх (Delivery Management). Вынік: адказалі 10 кампаній, з шасцю быў скрынінг, з трыма поўны цыкл сумоўяў (3-5 этапаў), два оферы. Разам канверсія — 10% у сумоўі, 3% — у оферы. Пачатак 2023 года, Польшча, адкрытая віза PBH».
• «Польшча. Улетку быў самы мёртвы сезон, амаль нуль рэакцый на водгукі. Ад сярэдзіны верасня стала лепей».
• «Польшча. У цэлым пры канцы года актыўнасць з боку працадаўцы вырасла. Праца ёсць, калі добра паказаць сябе на сумоўі — можна нават патаргавацца».
• «Праселі ўзроўні заробкаў».
• «Масавыя лэй-офы ў кампаніях = больш спецыялістаў у пошуках».
• «Для HR вельмі мала вакансій, а колькасць водгукаў на іх за дзень дасягае 100».
• «Зарплатныя дыяпазоны сталі меншымі. Працэс рэкрутынгу істотна расцягваецца ў часе. Паміж этапамі інтэрв’ю праходзіць 1-2 тыдні. Я так разумею, што хочуць адгледзець максімальную колькасць кандыдатаў. А раней за два дні можна было офер атрымаць».
• «Расійскі рынак быў у стагнацыі ў першай палове 2023-га. На C-level пазіцыі ўзровень зп істотна ўпаў, пасля сыходу замежных кампаній рынак быў перанасычаны топавымі кадрамі, і пісьменныя хантары паспелі ўхапіць кандыдатаў па ніжэйшых костах. Цяпер на рынку кадравы голад праз адсутнасць высокакваліфікаваных спяцоў middle+ і С-level, якія прагматычна цяпер не выходзяць на рынак. Назіраецца тэндэнцыя размарожвання рынку і выхаду ў актыўную фазу ў першым-другім квартале 2024-га».
• «Я думаю, што мая кар’ера скончаная».

Ці доўга? Як айцішнікі шукаюць працу ў Беларусі — вялікі рэсёрч

Па тэме

Ці доўга? Як айцішнікі шукаюць працу ў Беларусі — вялікі рэсёрч