Як БДУІР набірае ў 2024: месцаў на бюджэце больш, а платных рэзка менш

Сёлета БДУІР на першы курс плануе прыняць 2810 чалавек. За апошнія чатыры гады гэта самы нізкі план набору.

Для параўнання: у 2021 план склаў 2878 чалавек, у 2022 годзе — 2886 чалавек, у 2023 годзе — 2894 чалавекі. У параўнанні з мінулым годам колькасць месцаў ва ўніверсітэце для першакурснікаў скарацілася на 3% (мінус 84 месцы).

Бюджэтнікі і платнікі

Для бюджэтнікаў сёлета ў БДУІР выдзелена 1290 месцаў. Гэта амаль на 11% больш, чым летась. А вось платнікам не пашанцавала. Сёлета месцаў для іх значна менш, чым летась, — усяго 1520. Гэта антырэкорд за апошнія чатыры гады. У параўнанні з мінулым годам колькасць месцаў на платную форму навучання скарацілася на 12% (мінус 209 месцаў).

Што яшчэ змянілася

• Агульны планавы набор студэнтаў на дзённую форму амаль не змяніўся. Сёлета ён складае 2100 чалавек (у 2023 — 2114). Але змянілася размеркаванне месцаў паміж бюджэтнікам і платнікамі. На дзённую бюджэтную форму навучання колькасць месцаў вырасла на 7% да 1190 (у 2023 годзе — 1103 месцы). У той жа час набор платнікаў на дзённую форму скараціўся на 10% — са 1009 (у 2023) да 910 чалавек.
• Ад гэтага года ў БДУІР пачне навучанне новым спецыяльнасцям: «электроннае машынабудаванне», «кіберфізічныя сістэмы», «лічбавы маркетынг».
• БДУІР цалкам перапрацаваў канцэпцыю падрыхтоўкі па спецыяльнасці «мікра- і нанаэлектроніка». Па заканчэнні навучання выпускнікі атрымаюць і кваліфікацыю, і ступень магістра. 
• Упершыню прадугледжаныя бюджэтныя месцы на дыстанцыйнай форме. На гэты год іх 5. 
• У тры разы вырасла колькасць месцаў для завочнікаў-бюджэтнікаў (скарочаная форма), пры гэтым на 8% менш стала месцаў для завочнікаў-платнікаў (скарочаная форма). 

Змены па факультэтах

Паглядзелі, як змяніўся набор на дзённую бюджэтную і платную формы навучання па факультэтах.

Факультэт камп’ютарных сістэм і сетак

Планавы набор студэнтаў на першы курс на самы папулярны факультэт БДУІР сёлета меншы, чым летась. Усяго выдзелена 420 месцаў, у 2023 годзе іх было 465, або на 10% больш. 

План прыёму змяніўся за кошт карэкціровак колькасці месцаў для платнікаў: сёлета іх на 45 менш, чым летась (2024 — 205 месцаў, 2023 — 250 месцаў).

Для спецыяльнасці «камп’ютарная інжынерыя» колькасць платных месцаў скарацілася 100 да 85, для «інфарматыкі і тэхналогій праграмавання» — з 85 да 55. 

Факультэт камп’ютарнага праектавання

Агульны набор — 390 студэнтаў (у 2023 — 390).

Сёлета на факультэце з’явілася новая спецыяльнасць — «электроннае машынабудаванне». Для ахвотных выдзелена 30 месцаў (25 для бюджэтнікаў, 5 — для платнікаў). 

Агульная колькасць месцаў на дзённую бюджэтную форму на факультэце вырасла з 210 да 255, у той жа час колькасць платных месцаў скарацілася са 180 да 135. 

Факультэт інфармацыйных тэхналогій і кіравання

Агульны набор — 405 студэнтаў (у 2023 — 435).

Сёлета на факультэце пачнецца набор на новую спецыяльнасць — «кіберфізічныя сістэмы». Для ахвотных выдзелена 60 месцаў (50 для бюджэтнікаў, 10 — для платнікаў). 

Нягледзячы на ўключэнне ў план новай спецыяльнасці агульная колькасць месцаў на факультэце скарацілася за кошт платнікаў. Калі летась для навучання на платнай форме было выдзелена 220 месцаў, то сёлета толькі 190. Таксама факультэт амаль у два разы (з 210 да 120 месцаў) скараціў набор студэнтаў для навучання спецыяльнасці «сістэмы кіравання інфармацыяй».

Факультэт інфармацыйнай бяспекі 

Агульны набор — 265 студэнтаў (у 2023 — 235).

Колькасць платных месцаў для навучання спецыяльнасці «інфармацыйная бяспека» вырасла амаль у 3 разы — з 15 да 40. На 5 бюджэтных месцаў (са 125 да 130) вырас набор па спецыяльнасці «сістэмы і сеткі інфакамунікацый». 

Факультэт радыётэхнікі і электронікі

Агульны набор — 260 студэнтаў (у 2023 — 235).

Для бюджэтнікаў сёлета выдзелена 230 месцаў (у 2023 — 195), а вось для платнікаў 30 (на 10 менш). На факультэце скасавалі набор на платную форму адразу па трох спецыяльнасцях: «нанатэхналогіі і нанаматэрыялы», «інфармацыйныя і кіроўныя сістэмы фізічных установак», «мікра- і нанаэлектроніка».

Інжынерна-эканамічны факультэт

Агульны набор — 360 студэнтаў (у 2023 — 354).

Сёлета на факультэце з’явілася новая спецыяльнасць — «лічбавы маркетынг». Для ахвотных выдзелена 90 месцаў (15 для бюджэтнікаў, 75 — для платнікаў). 

У той жа час скараціўся планавы набор студэнтаў на спецыяльнасць «інфармацыйныя сістэмы і тэхналогіі». Колькасць месцаў для бюджэтнікаў скарацілася з 85 да 70, для платнікаў — са 155 да 80.