Belka Games звольніла супрацоўнікаў у Беларусі, Расіі і Літве

Што кажуць супрацоўнікі

Кампанія вырашыла скарачаць штат яшчэ пасля пачатку ваенных дзеянняў ва Украіне. Гэта было звязана са складанасцямі ў працы ў Беларусі і Расіі. Таксама паўплывалі фінансавыя прычыны.

— У кампаніі вялікі штат, але прыбытак, паводле маёй інфармацыі, не расце. Цяпер увесь мабільны геймдэў падае. У свеце крызіс, інфляцыя прымушае людзей эканоміць на забаўках, — расказаў адзін са звольненых супрацоўнікаў.

Паводле яго інфармацыі, у жніўні ў адзін момант было звольнена 50+ чалавек, якія працавалі ў Беларусі і Расіі.

«Фінансавы запас ёсць на 2 месяцы»

Яшчэ адзін былы супрацоўнік Belka Games расказаў, што некалькі чалавек былі звольненыя з літоўскага офіса. У прыватнасці, без працы засталіся ён і яго жонка, якая таксама працавала ў кампаніі.

— У Belka Games я адпрацаваў амаль 5 гадоў, жонка крыху менш. Абое мастакі, працавалі на топавым праекце Clockmaker (гульня тры ў шэраг). Падымалі яго з каленяў, змяняючы ўсю графіку.

На пачатку вясны на мітынгу фаўндары паведамілі пра складанасці для тых, хто працуе ў беларускім офісе. Пасля 24 лютага праз уведзеныя новыя санкцыі ніхто не мог гарантаваць, што з працай у Беларусі і Расіі ўсё будзе добра. Папярэдзілі, калі будуць скарачэнні, то, у першую чаргу, яны закрануць беларускія і расійскія падраздзяленні. Таму супрацоўнікам прапаноўвалі рэлакейт.

Мы пагадзіліся і рэлакаваліся ў Вільню, каб працаваць у літоўскім офісе Belka Games. Пераехалі ўсёй сям’ёй (з дзвюма дочкамі, сабакам і катом) на сваёй машыне. Кампанія ў сувязі з рэлакейтам індэксавала заробак. Плюс нам кампенсавалі выдаткі на візы, страхоўкі, у тым ліку на машыну, на тэсты на кавід і частку выдаткаў на арэнду кватэры.

У Літву мы пераехалі на пачатку красавіка. А 5 ліпеня мяне і жонку апавясцілі аб звальненні. Нібыта праз тое, што мы не прайшлі перфоманс рэв’ю.

Размова была вельмі непрыемнай. Усе KPI закрытыя, бывала, што сядзелі без працы, бо паспелі выканаць усе планы наперад. І тут пачулі такое.

Пра перфоманс рэв’ю ў літоўскім офісе мы не ведалі. Яно было ў Беларусі, і перад самым ад’ездам нам паведамілі, што мы прайшлі яго на выдатна. Таму, думаю, гэта проста падстава для звальнення. Дакладнай прычыны я не ведаю.

Нам першапачаткова прапанавалі альбо сысці адразу з выплатай кампенсацыі ў памеры двух заработных плат, альбо адпрацаваць месяц і атрымаць кампенсацыю ў памеры адной. Мы ў выніку сышлі ў неаплатны адпачынак, бо ад нашай працы адмовіліся, але ўжо быў запушчаны працэс атрымання BlueCard, які праводзіўся праз працоўныя акаўнты. Таму мы дачакаліся дазволу на жыхарства, пасля чаго нас звольнілі.

Мы аказаліся ў няпростай сітуацыі. У нас ёсць BlueCard як у высокакваліфікаваных спецыялістаў. Але на працягу трох месяцаў нам трэба знайсці новую працу ў літоўскай кампаніі, у іншым выпадку дазвол на жыхарства анулююць.

У прынцыпе, дастаткова каб адзін з сямейнікаў знайшоў працу ў літоўскай фірме, тады другі можа памяняць дазвол на жыхарства, каб яно было проста як для сямейніка, і адкрыць ІП.

Але ў Літве, як высветлілася, вельмі сумна з працай для такіх спецыялістаў, як мы. Адпаведных вакансій вельмі мала. Прынамсі па сваёй спецыялізацыі (3D-мастак) пакуль нічога знайсці не магу. Жонцы крыху прасцей, вакансій па яе спецыялізацыі (2D-мастак) паболей.

Пакуль ёсць фінансавы запас на пару месяцаў. Будзем думаць і круціцца, іншага выйсця няма. Нам трэба аплачваць арэнду жытла ў Вільні (каля 600 еўра). Акрамя таго, яшчэ ў Беларусі мы ўзялі крэдыт на куплю кватэры на другасным рынку. Пагашаць яго яшчэ больш за 5 гадоў. Старэйшая дачка пайшла ў першы клас у Вільні, малодшая ходзіць у дзіцячы садок. Так што ў найбліжэйшы навучальны год не плануем пераезду. Але будзем вывучаць варыянт з Польшчай.

Рэдакцыя dev.by накіравала пытанні пра скарачэнне супрацоўнікаў у кампанію Belka Games, і мы апублікуем адказы, калі іх атрымаем.

У беларускім офісе Belka Games яшчэ летась працавала больш за 100 чалавек. Дакладная колькасць супрацоўнікаў на гэты момант невядомая.

Раней мы пісалі, што ў кампаніі мінімум год не наймаюць у Беларусі. Ахвотным пераехаць даюць магчымасць уладкавацца ў Польшчы, Літве і Чарнагорыі. Шмат супрацоўнікаў [з Беларусі] сыходзіць самастойна з кампаніі, хтосьці згаджаецца на рэлакейты і пераязджае».

У кампаніі ёсць офісы ў ЗША, Украіне, Грузіі, Польшчы, Літве і на Кіпры. У прыватнасці, у літоўскім офісе, паводле звестак rekvizitai.vz.lt, зарэгістраваны 71 супрацоўнік. У пераліку лакацый адсутнічае Беларусь. 

На гэты момант на сайце кампаніі каля 20 вакансій. У апісанні вакансій пазначана, што супрацоўнікі могуць выбраць гнуткі графік працы. Можна хадзіць у офіс у Вільні і Лімасоле або працаваць аддалена.

Па выніках мінулага года Belka Games увайшла ў топ-3 паводле памеру атрыманай выручкі сярод паблішараў з беларускімі каранямі (2 месца). Кампанія атрымала 130,7 мільёна долараў. У параўнанні з 2020 годам выручка вырасла на 44,5%. Belka Games увайшла ў топ-100 мабільных паблішараў свету паводле версіі App Annie, у топ-20 па выручцы ў рэгіёне ЕМЕА.

Паводле апошніх звестак аналітычнай платформы Sensor Tower, у жніўні гэтага года выручка Belka Games склала 7 мільёнаў долараў. Для параўнання, у жніўні мінулага года кампанія атрымала выручку ў памеры 11 мільёнаў долараў.