Сузаснавальнік арганізацыі беларускай дыяспары Аджарыі Яўген Гацак, якога не пусцілі ў Грузію, з сям’ёй пераехаў у Польшчу

29 траўня, BPN. Сузаснавальнік арганізацыі беларускай дыяспары Аджарыі Яўген Гацак, якога раней не пусцілі ў Грузію, з сям’ёй прыляцеў 28 траўня ў Польшчу. Яны плануюць застацца ў гэтай краіне, паведаміў BPN Гацак.

“Атрымалася ўсё амаль што па плане. Далі візы, і ўсёй сям’ёй мы прыляцелі ў Польшчу”, — сказаў BPN Яўген Гацак.

Актывіст лічыць, што калі нехта з рэлакантаў праяўляе грамадзянскую актыўнасць, з’яўляецца медыйнай персонай, такія людзі “не вельмі патрэбныя ў Грузіі”.

Гацака не пусцілі ў Грузію 25 красавіка пасля вяртання з так званага “візарана” — выезду з краіны для абнулення тэрміну бесперапыннага знаходжання ў ёй (364 дні). Памежнікі таксама адмовілі яму ў атрыманні палітычнага прытулку.

“Мы як дыяспара будзем дамагацца спынення падобнай практыкі “выкідвання” беларусаў з Грузіі. У тым ліку і для гэтага сустракаліся з дэпутатамі грузінскага парламента 15 траўня”, — пракаментаваў сітуацыю BPN праваабаронца, намеснік кіраўніка Беларускай дыяспары Аджарыі Раман Кісляк.