Каардынацыйная рада выступіла за “неадкладную адмену” смяротнага пакарання ў Беларусі

9 кастрычніка, Позірк. Аб прыняцці рэзалюцыі “Аб безумоўнай і неадкладнай адмене смяротнага пакарання ў Беларусі” паведаміла Каардынацыйная рада (КР).

За прыняцце дакумента прагаласавалі 52 дэлегаты, супраць — адзін.

У дакуменце адзначаецца, што смяротнае пакаранне парушае права на жыццё і “прынцып недатыкальнасці чалавечай годнасці“, а таксама робіць наступствы судовай памылкі “фатальнымі і незваротнымі“.

Асобна ў рэзалюцыі звяртаецца ўвага на змены беларускага заканадаўства ў 2022 і 2023 гадах, якія пашырылі сферу прымянення смяротнага пакарання. Гаворка пра злачынствы, звязаныя з “замахам на ўчыненне акту тэрарызму“ і “дзяржаўнай здрадай”.

“Ва ўмовах татальнага палітычна матываванага пераследу і поўнага знішчэння незалежнага суда гэтыя нормы могуць быць выкарыстаныя супраць палітычных апанентаў рэжыму“, — гаворыцца ў дакуменце.

Рэзалюцыя ўпаўнаважвае дэлегацыю КР дамагацца адмены смяротнага пакарання ў выпадку правядзення круглага стала паміж дэмакратычнымі сіламі і прадстаўнікамі рэжыму Аляксандра Лукашэнкі. У прыватнасці, прапануецца замацаваць адпаведнае рашэнне ў выніковых палітычных дамоўленасцях, неадкладна ўвесці мараторый на выкананне смяротных прысудаў, замяніць ужо вынесеныя смяротныя прысуды іншымі пакараннямі і цалкам выключыць смяротнае пакаранне з крымінальнага заканадаўства.

У далейшым забарону на смяротнае пакаранне прапануецца замацаваць у Канстытуцыі Беларусі.

“Скасаванне смяротнага пакарання — гэта не толькі пытанне правоў чалавека, але і неабходная ўмова вяртання Беларусі ў еўрапейскую прававую прастору“, — падкрэсліваецца ў рэзалюцыі. На думку аўтараў дакумента, гэта адкрые шлях да магчымага ўступлення краіны ў Савет Еўропы і далучэння да міжнародных механізмаў абароны правоў чалавека.

Аўтар праекта рэзалюцыі — Мікіта Семяненка з фракцыі “Кааліцыя Латушкі і рух “За Свабоду”. У канчатковую рэдакцыю ўнесеныя прапановы іншых дэлегатаў Каардынацыйнай рады.

Беларусь застаецца адзінай краінай у Еўропе, дзе дагэтуль ужываецца смяротнае пакаранне.

Дэмакратычны лідар Святлана Ціханоўская ў Сусветны дзень супраць смяротнага пакарання 10 кастрычніка 2025 года паведаміла, што за 30 гадоў пры ўладзе Аляксандра Лукашэнкі каля 350 чалавек у Беларусі прысуджана да гэтай меры пакарання.