У Літве пасля пагоні затрыманы грамадзянін гэтай краіны і паляк з кантрабанднымі беларускімі цыгарэтамі

6 кастрычніка, Позірк. Аб затрыманні супрацоўнікамі Варэнскага пагранатрада грамадзян Літвы і Польшчы, якія перавозілі кантрабандныя беларускія цыгарэты, паведаміла Служба аховы дзяржаўнай мяжы (САДМ) пры МУС балтыйскай дзяржавы.

Паводле яе інфармацыі, 2 кастрычніка каля в. Вайнюнай (Лазійскі раён) памежнікі паспрабавалі спыніць для праверкі пазадарожнік BMW X3 з літоўскімі рэгістрацыйнымі нумарамі. Кіроўца не падпарадкаваўся патрабаванню спыніцца, таму ім “давялося пераследваць аўтамабіль каля 20 км”.

Удакладняецца, што каля в. Дварчышкай з аўто “раптоўна выскачылі двое мужчын і кінуліся ўцякаць”. Кіроўца, 48-гадовы грамадзянін Літвы, быў затрыманы недалёка ад аўтамабіля, а для пошуку другога ўцекача супрацоўнікі СОГГ прыцягнулі кінолага з сабакам: “Пасля паўгадзінных пошукаў яна прывяла памежнікаў да 37-гадовага грамадзяніна Польшчы, які хаваўся”.

Пры аглядзе аўтамабіля высветлілася, што ў ім перавозілася 6 тыс. пачкаў цыгарэт NZ Gold і Minsk 5 тыс. пачкаў цыгарэт Super Slims з беларускімі акцызнымі маркамі. Паводле папярэдніх даных, агульны кошт знойдзеных тытунёвых вырабаў з улікам усіх падаткаў, якія неабходна было б заплаціць у Літве, складае больш за 33 тыс. еўра.

Пачата дасудовае расследаванне. 4 кастрычніка суд пастанавіў арыштаваць грамадзяніна Літвы на 20 дзён, Польшчы — на адзін месяц.

Аўтамабіль і цыгарэты, якія незаконна перавозіліся, часова захоўваюцца ў падраздзяленнях Варэнскага пагранатрада САДМ.