Экс-баец палка Каліноўскага Шабуцкі завочна асуджаны на 19 гадоў пазбаўлення волі па 18 артыкулах КК

21 траўня, Позірк. Былы баец палка Каліноўскага блогер Максім Шабуцкі завочна асуджаны на 19 гадоў пазбаўлення волі, паведамляе праваабарончы цэнтр “Вясна“.

Працэс пачаўся 26 студзеня ў Гродзенскім абласным судзе ў рамках спецыяльнай вытворчасці і завяршыўся 20 траўня.

Пракуратура рэгіёна падтрымала абвінавачанне паводле 18 артыкулаў Крымінальнага кодэкса: ч. 3 арт. 361, ч. 3 арт. 130, ч. 1 арт. 293, ч. 1 арт. 342, ч. 1 і 2 арт. 367, ч. 1 і 2 арт. 368, арт. 369, 391, 188, 369¹, 370, ч. 2 арт. 361², ч. 1 арт. 361⁴ (у рэдакцыі закона ад 26 траўня 2021 года), ч. 2 арт. 361⁴, ч. 1, 2 і 3 арт. 361¹, ч. 2 арт. 285, ч. 1 арт. 361³, арт. 361⁵ і ч. 1 арт. 357.

Таксама Шабуцкаму прызначаны штраф у памеры 3,5 тыс. базавых велічынь (157,5 тыс. рублёў).

20 траўня вынесена яшчэ адно завочнае рашэнне: да 5 гадоў пазбаўлення волі Магілёўскі абласны суд прыгаварыў па чатырох крымінальных артыкулах мясцовага жыхара Мікалая Тарасенку. Спецвытворчасць вялася па арт. 188, ч. 3 арт. 361, ч. 1, 2 арт. 367, ч. 1 арт. 368 КК.

Спецыяльная вытворчасць па крымінальных справах праводзіцца ў Беларусі ў дачыненні да абвінавачанага, які знаходзіцца па-за межамі краіны і ўхіляецца ад яўкі ў орган, які вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх.

Даведка “Позірку”:

арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 188 — паклёп;

арт. 285 — стварэнне злачыннай арганізацыі альбо ўдзел у ёй;

арт. 293 — масавыя беспарадкі;

арт. 342 — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;

арт. 357 — змова ці іншыя дзеянні, учыненыя з мэтай захопу дзяржаўнай улады;

арт. 361 — заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

арт. 361¹ — стварэнне экстрэмісцкага фарміравання альбо ўдзел у ім;

арт. 361² — фінансаванне экстрэмісцкай дзейнасці;

арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асобаў да такога ўдзелу;

арт. 361⁴ (у ранейшай і цяперашняй рэдакцыях) — садзейнічанне экстрэмісцкай дзейнасці;

арт. 361⁵ — праходжанне навучання ці іншай падрыхтоўкі для ўдзелу ў экстрэмісцкай дзейнасці;

арт. 367 — паклёп у дачыненні да прэзідэнта;

арт. 368 — абраза прэзідэнта;

арт. 369 — абраза прадстаўніка ўлады;

арт. 369¹ — дыскрэдытацыя Рэспублікі Беларусь;

арт. 370 — здзек з дзяржаўных сімвалаў;

арт. 391 — абраза суддзі або народнага засядацеля.