22 красавіка, Позірк. Аб прыпыненні выканання рэгулярных рэйсаў у/з Дубая (ААЭ) да 20 траўня паведаміла нацыянальная авіякампанія “Белавія”.
Пасажыры адмененых рэйсаў могуць аформіць вяртанне грошай за квіткі па месцы іх набыцця.
18 сакавіка ў кампаніі паведамілі аб падаўжэнні да 19 красавіка ўключна прыпынення выканання рэгулярных рэйсаў у/з Дубая ў сувязі з адкліканнем слотаў і дазволаў адпаведнымі авіяцыйнымі ўладамі.
13 сакавіка кампанія паведаміла, што з моманту пачатку баявых дзеянняў на Блізкім Усходзе выканала восем вывазных рэйсаў у Дубай і вярнула ў Беларусь 1.865 чалавек.
Раней перавозчык паведамляў, што ўлады Дубая адклікалі слоты і дазволы на палёты да 28 сакавіка.
Баявыя дзеянні на Блізкім Усходзе пачаліся 28 лютага, калі Ізраіль і ЗША распачалі ваенную аперацыю ў Іране.
