Да пагаднення аб прасоўванні беларускіх тавараў далучылася 800 суб’ектаў

5 снежня, Позірк. Да пагаднення аб супрацоўніцтве ў вобласці павышэння эфектыўнасці продажу тавараў айчыннай вытворчасці далучыліся 800 суб’ектаў, паведамляе Міністэрства антыманапольнага рэгулявання і гандлю (МАРГ).

Сярод новых удзельнікаў дзеючага з красавіка 2025 года пагаднення — гандлёвыя сеткі “Санта”, “Суседзі”, “Алмі”, “Еўраопт”, “Вожык”, “Сем пятніц”, Unistore, “Белмаркет”, Гандлёвы дом АТЛАНТ, “Кірмаш”, а таксама такія вытворцы, як Мінскі завод ігрыстых вінаў, “ВіцебскЭнерга”, Полацкі камбікормавы завод і інш.

Пагадненне пад эгідай МАРГ падпісаў шэраг міністэрстваў і дзяржаўных канцэрнаў у красавіку гэтага года.

Паводле даных на верасень да яго далучылася каля 550 суб’ектаў.

Як паведамлялася раней, доля продажу тавараў айчыннай вытворчасці ў аб’ектах гандлю Беларусі па выніках студзеня — верасня 2025 года зменшылася, склаўшы 54,9% (за аналагічны перыяд 2024-га — 57,7%), сведчыць праведзены “Позіркам” аналіз даных Нацыянальнага статыстычнага камітэта.

Адмоўная дынаміка зафіксавана ва ўсіх рэгіёнах і сталіцы: Віцебская вобласць — 63,1% (годам раней — 66,7%); Магілёўская вобласць — 62,9% (65,8%); Брэсцкая вобласць — 62,7% (66,1%); Гродзенская вобласць — 62,5% (66,3%); Гомельская вобласць — 61,1% (64,6%); Мінская вобласць — 58,2% (63,1%); Мінск — 41,5% (42,9%).

Цалкам арганізацыі гандлю забяспечаны беларускімі бензінам, дызельным палівам, свінінай і яйкамі.

Высокая доля (ад 95% і вышэй) айчынных ялавічыны, харчовых субпрадуктаў, мяса хатняй птушкі і дзічыны — па 99,9%, цукру і цукразамяняльнікаў — 99,5%, гарэлкі — 99,3%, маторнага паліва — 99,2%, мясных прадуктаў — 99,1%, кансерваў з мяса і харчовых субпрадуктаў — 98,4%, піламатэрыялаў — 96,4%, мукі — 95,8%.

Разам з тым мінімальная (да 25%) доля ў продажы беларускіх тэлевізараў — 25%, абутку скуранога — 24,2%, парфумерна-касметычнай прадукцыі і туалетных прылад — 20,7%, ровараў — 17,9%, пральных машын бытавых і машын для сушкі адзення — 17,1%, рыбы — 16,5%, алею расліннага — 14,1%, верхняга адзення — 13,6%, трыкатажнага адзення — 10,3%, патрыманых легкавых аўтамабіляў — 6,2%.

Пытанне павелічэння продажаў на ўнутраным рынку тавараў айчыннай вытворчасці сёння стаіць “досыць сур’ёзна”, заявіла на прэс-канферэнцыі ў Мінску 23 ліпеня намесніца міністра антыманапольнага рэгулявання і гандлю Святлана Караткевіч.

“Мы зрабілі аналітыку, пачынаючы з 2015 года, і, на жаль, неабходна адзначыць, што рост не адзначаецца з года ў год. Мы, на жаль, дапускаем падзенне долі тавараў айчыннай вытворчасці”, — сказала чыноўніца.